امنیتي چارواکي وايي افغان ځواکونو هغه ځانمرګی وژلی چې غوښتل یې د کندهار په ارغنداب ولسوالۍ کې د ځانګړو سرتیرو پر یوه عملیاتي مرکز موټر بم برید وکړي.
پېښه نن جمعه فبروري ۲۶(کب اتمه) د ارغنداب ولسوالۍ په «جي لاهور» سیمه کې سهار وختي ۳بجې شوې ده.
د ۲۰۵ اتل قول اردو ویاند جګړن محمد صادق عیسی امریکا غږ ته وویل چې وروسته موټر بم چاودنه کړې چې پرمهال دوه افغان سرتیري ټپيان شوي دي.
هغه وويل: "نن سهار یوه ځانمرګي بریدګر غوښتل چې زموږ د امنیتي او دفاعي ځواکونو پر قرارګاه باندي برید وکړي چې زموږ د قواوو له لوري پرې لومړی برید شوی ځانمرګی برید ګر لمنځه تللی، خو په موټر بم چاودنه کې يې زموږ تراوسه ۲ تنه نظاميان چې په پېښه کې ټپي شوي نظامي روغتون ته لېږدول شوي."
ویل کیږي چې د چاودنې شدت دومره زیات وو چې د کندهار ښار په ګډون يې تر لېرو سیمو پوري غږ اورېدل شوی دی.
امنیتي سرچینې وايي چې تر چاودنې وروسته جګړه هم شوې او تر سهار پنځو بجو پوري يې دوام در لود.
د کندهار یوه لوړ پوړي امنیتي مقام د نوم نه ښودلو په شرط امریکا غږ ته وويل برید پر تصفیوي عملیاتو بوخت د ځانګړو ځواکونو پر یو مرکز د هاموي ټانک په وسیله موټر بم برید شوی دی.
سرچیني زیاته کړه: "د ارغنداب ولسوالۍ په جي لاهور دښت سیمه کې د کمانډو ځواکونو پر سرتیرو چې په یوه سرای کې ځای پر ځای شوي وو د هاموي ټانک په وسیله ځانمرګی برید شوی. وروسته جګړه پيل شوې چې ۱۰ تنه افغان پولیس پکښې وژل شوي او یو ۸ تنه نور يې ټپیان شوي، د چاودنې د شدت له کبله په سیمه کې مالي زیان هم رامنځته شوی."
دغه سرچینې وویل چې په ټپیانو کې دوه د ملي اردو سرتیري هم شامل دي او په وینا یې ملکي وګړو ته مرګ ژوبله نه ده اوښتې.
په ورته وخت کې په ولسي جرګه کې کندهار د خلکو استازي او د ارغنداب ولسوالۍ اوسیدونکي خلیل احمد مجاهد هم د هاموي ټانک په وسیله پر افغان سرتیرو چاودنه تائید کړه.
هغه وويل چې په سیمه کې د افغان ګډو ځواکونو تصفیوي عملیاتو کې ځيني کلي د وسله والو له حضور څخه پاک شوي خو لاهم په سیمه کې جګړه ده.
د زیاته کړه: "زموږ د معلوماتو له مخې پر هغو نظامي قواوو د هاموي ټانک په وسیله ځانمرګی برید شوی چې په سیمه کې په نظامي عملیاتو بوخت وو. په سیمه کې جګړیز حالت دی او له عامو خلکو سره اړیکه هم نشته."
ارغنداب ولسوالي له تیرو څلورو میاشتو راهیسې د شدیدو جګړو شاهده سیمه ده چې دوې اونۍ وړاندي يې په کوهک سیمه کې هم د پوليسو پر یوه مرکز د هاموي ټانک په وسیله ځانمرګی برید شوی و.
د یادي ولسوالۍ ډېرې کورنۍ د جګړو له ويري له خپلو سیمو څخه کډوالي شوي.
د ۲۰۵ اتل قول اردو چارواکي هم وايي چې د ارغنداب په ولسوالۍ کې د ګډو افغان ځواکونو تصفیوي عملیات له تیرو څو ورځو راهیسې پيل شوي چې له مخې يې هره ورځ له ۵۰ څخه تر ۶۰ پوري د سړک د غاړې ماینونه لمنځه وړل کیږي.
خپله وسله والو طالبانو د ارغنداب ولسوالۍ د پېښي په اړه کومه تبصره نده کړې.
