ولسمشر محمد اشرف غني د یکشنبې په ورځ له یوې جګپوړې امریکايي چارواکې سره پر ایران د بندیزونو په اړه وغږید.
د دوشنبې په ورځ پر ایران د متحدو ایالتونو د اقتصادي بندیزونو نوې لړۍ پیل کیږي. دغه بندیزونه چې د امریکايي چارواکو په وینا ډیر پراخ دي او د ایراني رژيم اساسي اقتصادي سرچینې په نښه کوي، د ایران د اټمي پروګرام، نړیوالې ترهګرۍ او سیمیز امنیت په تړاو د واشنګټن او تهران د ژورو اختلافاتو څرګندوینه کوي.
امریکايي چارواکو ویلي چې سملاسي اته هیوادونه به د دغو بندیزونو له محدودیتونو نسبي معافیت ولري، خو د دغو هیوادونه نومونه یې ندي څرګند کړي. د چین، هند او روسيې په ګډون، افغانستان هم له ایران سره پراخې اقتصادي اړیکې لري.
افغان حکومت چې له تیرو پنځلسو کلونو راهیسې یې د ایران او امریکا تر منځ د بې پرې والي او ناپیلتوب تګلاره نیولې، اوس یې له امریکايي چارواکو سره د بندیزونو د محدویتونو په اړه خبرې پیل کړي.
ولسمشر محمد اشرف غني د یکشنبې په ورځ د متحدو ایالتونو د باندنیو چارو د وزارت له یوې جګپوړې چارواکې، الیز ویلز، سره د ایران د چابهار بندر په اړه خبرې وکړې.
د ولسمشر غني دفتر د دې خبرو تایید کړی خو د دغو خبرو په اړه یې ډیر معلومات ندي خپاره کړي.
ایران د چابهار بندر تیرکال پدې تمه پرانیست چې د هند، افغانستان او مرکزي آسیايي هیوادونو تر منځ به سوداګریزې او اقتصادي راکړې ورکړې پیاوړې او اسانه کړي.
افغانستان چې له ګاونډي پاکستان سره د ترانزیت ډیرې ستونزې لري او له کبله یې د دواړو هیوادونو تر منځ سوداګري ډیره اغیزمنه شوې ده، د چابهار ته د یوه عمده اقتصادي بندر په سترګه ګوري.
ایراني چارواکو خبرداری ورکړې چې پر دوي د امریکا بندیزونه به د سیمې او نړۍ امن او ثبات ته زیان ورسوي.
