روهیت شرما له سریلنکا سره په یوې ورځنۍ نړیوالې لوبې کې ۲۶۴ رنزونه وکړل او په کرېکټ کې یې د ډېرو رنزونو نړیوال ریکارډ مات کړ او په دې توگه دی لومړنی لوبغاړی شو چې د کرېکټ په یوې ورځنیو نړیوالو لوبو کې ۲۶۴ منډې یا رنزونه کوي.
روهیت شرما دغه ریکارډ د پنجشنبې په ورځ د نومبر په ۱۳ نېټه د هند په کلکتې ښار کې له سریلنکا سره په یوې لوبې کې جوړ کړ.
ده په ۱۷۳ توپونو د ۳۳ څلوریزو او نهو شپږیزو په مټ ۲۶۴ رنزونه وکړل، ښاغلي شرما په ۲۰۱۳ کال کې د هند په بنګلور ښار کې د اسټرالیا خلاف په یوې بلې لوبې کې هم د ډېرو رنزونو ریکارډ جوړ کړی و چې۲۰۹ منډې وې، خو هومره نه وې چې د بل وتلي هندي لوبغاړي ورېندر سیواک ریکارډ مات کړي.
روهیت شرما د کرېکټ مشهورې وېیپاڼې کرېک انفو ته وویل "مهمه دا ده چې پوه شﺉ چې څومره منډې شوي دي، څومره اورونه شوي دي، د کوم توپ اچوونکي څومره اورونه پاتې دي. زما په فکر کله چې تاسو منډې جوړوﺉ نو همدغه خبرې ډېرې مهمې دي او ما همدا کار وکړ. "
روهیت شرما هیله وښوده چې همداسې یوه بله لوبه هم وکړي.
ښاغلي شرما ته له شاوخوا دوه میاشتني ځنډ وروسته نن په ملي لوبډلې کې د لوبېدو چانس ورکړل شوی و.
تر روهیت شرما وړاندې د هند بل مشهوره لوبغاړي ورېندر سیواک په ۲۰۱۱ کال کې یې د ویسټ انډیز په وړاندې یوې لوبې کې د ۲۱۹ رنزونو ریکارډ جوړ کړی و.
تر سیواک وروسته ډېرې منډې بیا هم د روهیت شرما دي چې ۲۰۹ دي، ورپسې د هند د بل افسانوي لوبغاړي سچن ټنډولګر ریکارډ دی چې ۲۰۰ رنزونه دي.
له ښاغلي ټنډولکر وروسته بیا د زمبابوۍ منډه جوړوونکي چارلس کوینټري په ۲۰۰۹ کال کې د بنګلدیش په خلاف یوې لوبې کې ۱۹۴ رنزونه وکړل او له څو کلونو وروسته یې د پاکستان د پخواني لوبغاړي سعید انور ریکارډ مات کړل.
ښاغلي انور په ۱۹۹۷ کال کې د هند په بنګلور کې د کوربه هېواد پر خلاف یوې لوبې کې ۱۹۴ رنزونه کړي و.
په لوبې کې هېڅ یو ریکارډ هم تلپاتی نه وي، خو ښايي د کرېکټ په یوې ورځنیو نړیوالو لوبو کې د هندي لوبغاړي روهیت شرما د ۲۶۴ رنزونو د ریګارډ ماتول ډېر وخت ونیسي.
