د افغانستان د کورنیو چارو وزارت وايي، د حکومت د رسنیو د مرکز مشر دواخان مینه پال په کابل کې ترور شوی دی.
د افغانستان د کورنیو چارو وزارت ویاند میرویس ستانکزي نن جمعه اګست شپږمه (زمري ۱۵) وویل چې مینه پال نن د کابل ښار په اوومه ناحیه کې په دارالامان کې د عثمان غني جومات ته څېرمه د جمعې تر لمانځه وروسته په ډزو وژل شوی دی.
نوموړي زیاته کړې: " تور مخو، بې زړه او وحشي تروریستانو یو ځل بیا په وحشي او بزدلانه عمل لاس پوري کړ، یو رښتینی، وطندوست او مبارز ځوان چې تل به د دښمن د تبلیغاتو په مقابل کې لکه د فولادو غر ولاړ و... په یو تروریستي عمل په شهادت ورسوی."
د حکومت د رسنیو د مرکز پر مشر دواخان مینه پال د برید مسؤلیت وسله والو طالبانو په غاړه اخیستی دی.
دواخان مینه پال لومړی د افغان ولسمشر محمد اشرف غني د ویاند مرستیال او تر هغه وروسته د افغان حکومت د رسنیو د مرکز رئیس وټاکل شو.
تر هغه مخکې ښاغلی مینه پال د څو کلونو لپاره د ازادۍ راډیو خبریال او وروسته د کندهار د اطلاعاتو او فرهنګ ریاست سرپرست او د کندهار ولایت ویاند و.
نوموړی د څه وخت لپاره د افغانستان د عامه کتابتونونو رئیس هم و.
څه موده مخکې په کندهار کې د دوا خان مینه پال د کورنۍ یو بل غړی چې خبریال و، هم طالبانو وواژه.
