د افغانستان د جمهوري ریاست لومړنی مرستیال عبدالرشید دوستم ویلي دي چې د نورو سیاستمدارانو سره یو ځای به د افغانستان په اساسي قانون کې د اصلاحاتو په راوستلو کار وکړې.
یوې دپلوماتیکې منبع دغه خبرې په ترکیې کې د امریکا غږ د ترکیې څانگې ته کړیدي.
د یادونې وړ ده چې دغه خبرې تیره میاشت د ښاغلي دوستم د مشر زوي د واده په مراسمو کې شویدي.
هغه کسان چې دوستم د خپل زوي واده ته رابللې و، په هغې کې صلاح الدین رباني، محمد محقق او د بلخ والي عطا محمد نور شامل و.
ښاغلی دوستم د می په ٢٠ نیټه ترکیې ته تللی او هلته یې خپل طبي معاینات هم کړې او د زوي واده ېې هم و.
داسې ویل کیږي چې دوستم د افغانستان نه ترکیې ته په خپله خوښه ځان تبعید کړیدی ، ځکه چې په افغانستان کې د هغه په ضد ځینې قانوني دعوې روانې دي. افغان چارواکو په دی هکله څه نه دي ویلي.
د ترکیې د بهرنیو چارو وزارت هم په ترکیې کې د دوستم د موجودیت په هکله د تبصرې نه ډډه کړیده.
په انقره کې ډپلوماتیکې سرچینې چې د دوستم سره نژدې اړیکې لري د امریکا غږ د ترکیې څانگې ته د نوم د نه څرگندولو په شرط وویل چې ښاغلي دوستم دغه خبرې د خپل زوي د واده په وخت کړیدي.
دوستم په انقرې کې دوه کورونه لري.
دغې سرچینې امریکاغږ ته وویل چې "د افغانستان دغه مشران چې دوستم یې کوربه و په دی سره موافق شول چې په اساسي قانون کې به د اصلاحاتو لپاره ژر تر ژره کار شروع کړې."