یوې زورورې زلزلې د جنوبي اسیا هېوادونه ولړزول، د زلزلې مرکز د افغانستان شمال ښودل شوی دی.
په افغانستان کې د بېړنیو حالاتو سره د مبارزې د ادارې ویاند عمر محمودي د رویټرز خبري اژانس ته ویلي، چې تراوسه د زلزلې له کبله د مالي او ځاني تلفاتو په اړه معلومات نلري.
په همدې حال کې د پاکستان په خیبرپښتونخوا کې د روغتون چارواکو ویلي چې شاوخوا ۳۰ زخمیان چې ښځې او ماشومان هم په کې دي، روغتونونو ته انتقال شوي دي.
د پاکستان د عاجلو پیښو سره د مبارزې ادارې ویلي دي چې پنځه کسه د خیبر پښتونخوا په ایالت کې مړه شوي دي.
د اسوشیټټ پرس خبري اژانس وايي د پاکستان په ګلګت بلستان کې یو کس مړ شوی دی.
تراوسه په شویو هېوادونو کې د دغې زلزلې له کبله د نورو ځاني او مالي زیانونو په اړه راپورونه ورکړل شوي نه دي.
د دغې زلزلې مرکز بدخشان ولایت د اشک اشم ولسوالۍ په ۴۰ کیلو مېترۍ کې ښودل شوی دی. د امریکا د جیولوژۍ اداره وايي، چې د زلزلې شدت ۶.۶ درجې و او عمق یې شاو خوا ٢١٠ کیلومیتره و.
زلزله په کابل، اسلام اباد او نوي ډهلي کې وه، چې اوسېدونکي یې سخت وارخطا او اوتر کړل.
د ۲۰۱۵ کال د اکتوبر په میاشت کې د ۷.۵ په اندازې یوې زورورې زلزلې په پاکستان او افغانستان کې شاوخوا ۴۰۰ تنه مړه کړل.