د جرمني امنیتي مقامات ویلي چې د هیواد په لویدیځ کې یې په ناڅاپي عملیاتو کې ١١ تنه د "سخت دریځو" بریدونو د کولو په تور نیولي دي.
دغه کسان د فرانکفورت ښار ته نژدې نیول شوي او ټول د جرمني اوسیدونکي دي.
مقاماتو ویلي چې د نیول شویو کسانو له ډلې نه دوه تنه یې ٣١ کلن دي او یو بل ٢١ کلن دی چې درې واړه د اصلي عاملینو په توگه یاد شوي دي.
دغه کسان چې ټول یې د ٢٠ او ۴٢ کالو ترمنځ عمر لري د ترهگریزو عملیاتو په ترسره کولو او همداشان د تروریستي عملیاتو د تمویلولو په تور نیول شوي دي.
تر اوسه دا نده څرگنده شوې چې ددغو کسانو له لورې پلان شوي بریدونه څومره جدي وو.
د جرمني د کورنیو چارو وزیر وویل "پولیسو په سم وخت اقدام کړی او د هغو احتمالي بریدونو مخه یې نیولې ده چې دغه کسان یې په پلان کولو بوخت وو".
ویل شوي ددې احتمال شته چې دغو کسانو د بریدونو د ترسره کولو لپاره یو لوی موټر کرایه کړی و، د وسلو خرڅونکو سره یې اړیکه نیولې وه او همداشان ددې کار لپاره یې پیسې برابرې کړې وې.
امنیتي مقاماتو ددغو کسانو د نیولو په ځای کې څه دپاسه ٢٠ زره یورو نغدې پیسې، څو چاقوگان، لږ مخدره توکي او د فرانکفورت ښار په شاوخوا محلاتو کې د بریدونو د ترسره کولو په هکله اسناد هم ترلاسه کړي دي.