د جرمنی صدراعظمې انگلا مرکل د جرمني د غټو کمپنیو سره غونډه کوي چې څنگه جرمني پناه غوښتونکو ته چې تېر کال یو دم دغه هیواد ته ورغلي دي، کاورنه پیدا کړي.
مرکل د شنبې په ورځ د فولکس واگن او زیمنس د کمپنیو نمایندگانو ته بلنه ورکړېده چې د سپتمبر د میاشتې په نیمایي کې په برلین کې غونډی کې برخه واخلي.
د اسوشیټډ پرس خبري اژانس وایي مرکل هیله لري چې ددې کمپنیو د مدیرانو دا خبره واوري چې دغه پناه غوښتونکي کوم ډول کارونو کې استخدامیدلی شی.
یوازې یو ملیون مهاجر په ۲۰۱۵ کال کې په جرمني کې راجستر شویدي او د مرکل د پالیسۍ یوه برخه داده چې د مستحقو پناه غوښتونکو سره مرسته وشې، چې ژر جرمني ژبه زده کړي، کارونه زده کړي او وګمارل شي.
جرمني هدغه راز خپلو ملکونو د هغو پناه غوښتونکو د بیرته لیږلو پرگرام هم چټکوي چې، د مهاجرت او سیاسي پناه په قوانیو او شرایطو برابر نه دي.
پر دې سربېره، د جرمني د صدراعظمې انگیلا مرکل ایتلافي حکومت د جنورۍ په ٢٧ د یو نوي وړاندیز شوی قانون ومانه، چې له مخې یې په جنایي جرمونو تورن پناه غوښتونکي له جرمني څخه په اسانه ایستل کېدی شي.
ددې قانون له مخې هغه مهاجر چې د اروپایي ټولنې اوسیدونکي نه وي او په فزیکي او جنسي تیریو تورن شوي وي، له دې هیواد څخه شړل کیږي.
ملګري ملتونه وايي ۲۰۱۵ کال اروپا ته د کډوالو او پناه غوښتونکو د شمېر له پلوه ۲۰۱۵ کال تاریخي کال وو. میلیونونه کډوال اروپا ته ولاړ او زرګونه یې اروپا ته د رسېدو په هیله په سمندر کې ډوب او مړه شول.
په دغو کډوالو او پناه غوښتونکو کې یې ډېر د جنګ ځپلو هېوادونو، لکه سوریې، عراق، افغانستان او داسې نورو هېوادونو وګړي دي.