په پاکستان کې ناپیژانده وسله والو د چهارشنبې په ورځ، فبروري ۱۹ (کب لومړۍ) یو پولیس په ډزو وواژه چې د خیبر پښتونخوا په باجوړ سیمه کې یې د پولیو د واکسیناتورانو امنیت نیولی و.
د باجور سیمې یو امنیتي مقام فرانس پرس خبري اژانس ته وویل: "دوو موټرسایکل سپرو بریدګرو د پولیو واکسیناتورانو د ټیم پرساتونکي ډزې وکړې ... په پایله کې، ساتونکی ځای په ځای ووژل شو... په پیښه کې د واکسیناتورانو ټیم ته کوم ته هیڅ زیان نه دی اوښتی."
پاکستان او افغانستان دا مهال په نړۍ کې يوازيني دوه هېوادونه دي چې لا هم د پولیو ویروس په کې شته او ماشومان ترې اغیزمن کېږي. همدارنګه په تیره لسیزه کې، سلګونه پولیس افسران او روغتیایی پرسونل د پاکستان د دولت ضد تندلارو لخوا وژل شوي دي.
دا په داسې حال کې ده چې پاکستان د ماشومانو د فلج د پیښو له زیاتوالي سره مخامخ دی.
یوازې سږ کال، پدغه هېواد کې ددې ناروغۍ دوه نوې پیښې ثبت شوي دي. د ثبت شویو ارقامو له مخې، په پاکستان کې تیر کال لږترلږه ۷۳ کسان په پولیو اخته شوي دي. دا شمیره د ۲۰۲۳ کال د پولیو د شپږو ثبت شویو پیښو په پرتله د پام وړ زیاتوالی ښیې.
د ځايي پولیسو یو بل جګپوړی امنیتي چارواکي، وقاص رفیق په وینا، د باجوړ په سیمه کې د پولیو ضد واکسیناسیون کمپاین د اورپکو د بریدونو د زیاتوالي او امنیتي دلایلو له مخې ځنډول شوی و.
هغه وویل: "د دې برید سره سره، دا کمپاین د پیښې له ځای پرته، په ټولو سیمو کې دوام لري. "
بلخوا، روغتیاپالان وايي چې پوليو يوه ويروسي ناروغي ده چې درملنه نه لري او يوازې واکسين کولاى شي چې ماشومان له دغې ناروغۍ څخه وژغوري. هغوی ټینګار کوي چې اړینه ده چې تر پنځو کلونو پورې عمر لرونکي ټول ماشومان باید هر ځل د پولیو د کمپاين پر مهال واکسین شي.
همدارنګه د پولیو په یو سمبولیک کمپاین کې چې د امریکا د څارګري ادارې (سي ای اې) لخوا په ۲۰۱۱ کال کې په پاکستان کې د اسامه بن لادن د موندلو لپاره تنظیم شوی و، د دې کمپاین اعتبار ته زیان ورساوه.
په ورته وخت کې، د ایران د عامې روغتیا وزارت مرستیال علي رضا رئیسي د دوشنبې په ورځ فبرورۍ ۱۷ (سلواغې ۲۹مه) ایران ته خبرداری ورکړ چې له پاکستان او افغانستان څخه به د پولیو ویروس ورانتقال شي.
رئیسي په پاکستان او افغانستان کې همدغو پېښو ته په کتو وویل: "ایران د ګوزڼ د دوو اصلي هېوادونو (پاکستان او افغانستان) په منځ کې دی او د رسمي او غیر رسمي تګ راتګ له کبله د دغه ویروس له جدي او دوامداره خطر سره مخامخ دي. "
د خیبر پښتونخوا په باجوړ سیمه کې یې د پولیو د واکسیناتورانو پر ټیم وسله وال برید په داسې وخت کې شوی، چې په پاکستان کې د کرکټ چمپینز ټرافي سیالۍ پیل شوې دي. دا سیالۍ چې د چهارشنبې په ورځ دپاکستان لوبډلې په کوربتوب پیل شوې، د نړۍ د اوو هېوادوتو د کرکټ ملي لوبډلې ددغه هېواد په بیلابیلو ښارونو لکه راولپنډي، کراچۍ او لاهور کې د سختو امنیتي تدابیرو لاندې دي.
ددغه مطلب د چمتو کولو لپاره د فرانس پرس اژانس معلومات کارول شوي.
فورم \ دبحث خونه