د روان کال د حج مراسم د سپتامبر له ۲۲ تر ۲۶ ترسره کیږي. سعودي چارواکو ویلي چې پدې حج کې د نږدې درې میلیونه حاجیانو د انتظام چمتوالی لري.
د حج مراسم په نړۍ کې یوه ستره انساني اجتماع ګڼل کیږي چې ساری یې په نورو غونډو کې نه لیدل کیږي.
د حج په مراسمو کې له ټکنالوژۍ نه هم ګټه اخیستل کيږي. سږ کال به ۱۲ پلازما تلویزیونونه چې هر یو یې دوه متر بر لري د مسجدالحرام شاوخوا ودرول شي چې حاجیانو پر وخت معلومات خپاره کړي.
اټکل کیږي چې حاجیان هرکال څه باندې ۲۰ میلیون لیټر زم زم اوبه په سترو بوتلونو او بوشکو کې کې خپلو هیوادونو ته وړي.
اندونیزیا چې د وګړو له پلوه تر ټولو بانفوسه مسلمان هیواد پیژندل کیږي سږ کال یې ۱۶۸ زره حاجیان حج ته لیږلي دي. حج ته تقریبا د نړۍ له هر ګوټ نه مسلمانان ورځي. په عمومي ډول د حج مراسم یوه حاجي لپاره له ۴۶۰۰ تر ۵۰۰۰ ډالرو لګښت لري.
د افغانستان د حج او اوقافو وزارت وايي چې روان کال کې ۲۴ زره افغان حاجیان د حج د فریضې د اداکولو لپاره تللي دي.
د حاجیان او د حج د مراسمو د امنیت لپاره سعودي عربستان ۱۰۰ امنیتي ځواکونه په کار اچولي دي.
سعودي چارواکو د بیړنیو روغتیايي خدماتو لپاره ۲۵ زره روغتیاپالان چمتو شوي دي.
د حج د مراسمو په لړ کې د هغو کسانو لپاره چې معیوبه یا ناروغه دي د طواف کولو او نورو چارو د ترسره کولو لپاره مرسته کیږي.
حج په مراسمو کې د څارویو ذبح هم کیږي. په ۲۰۱۴ کال کې حاجیانو یوازې ۷۷۰ زره پسونه ذبح کړل.
