د چمپینز ټرافي د ۲۰۲۵ کال په روانو سیالیو کې هند د یکشنبې په و رځ مارچ دویمه (کب ۱۲) په خپلې وروستۍ ګروپي لوبې کې نیوزلنډ ته ماتې ورکړه.
هند د دغو سیالیو لومړۍ لوبډله شوه چې خپلې درې واړه ګروبي لوبې یې وګټلې. وروستۍ لوبه یې په دوبۍ کې وه چې نیوزلنډ ته یې د ۲۵۰ منډو هدف وټاکه او د نیوزلنډ ټوله لوبډله یې په ۲۰۵ منډو وسوځوله.
د هند لوبغاړي شریاس تر ټولو ډېر ۷۹ منډې وکړې. د نیوزلنډ د لوبډلې کین ویلیمسن ۸۱ منډې وکړې.
د هند ورو توپ اچوونکي وارون چکراورتي د نیوزلنډ پنځه لوبغاړي وسوځول او د لوبې غوره لوبغاړی شو.
له نننۍ لوبې وروسته مشخصه شوه چې د چمپینز ټرافي په نیمه پایلوبو کې به کومه لوبډله له کومې سره مخامخېږي.
هند په الف ګروپ کې لومړی مقام ترلاسه کړ او په دې سره به د ب ګروپ له دویم مقام سره نیمه پایلوبه کوي. او د ب ګروپ اول مقام لوبډله به د الف ګروپ له دویم مقام لوبډلې سره نیمه پایلوبه کوي.
لومړۍ سیمي فانیل به د سه شنبې په ورځ په دوبۍ کې د استرالیا او هند ترمنځ وي او دویم سیمي فانیل به په لاهور کې د نیوزلنډ او جنوبي افریقا ترمنځ وي.
د دغو سیالیو پایلوبه به د مارچ په نهمه کېږي، که هند پایلوبې ته ووت، پایلوبه به هم په دوبۍ کې کېږي.
فورم \ دبحث خونه