جنوبي افریقا د شنبې په ورځ، مارچ لومړۍ (کب ۱۱) د کرکټ چمپینز ټرافي په ۱۱مه لوبه کې انګلستان ته لویه ماتې ورکړه چې ورسره افغانستان هم له دغو سیالیو څخه بهر شو.
جنوبي افریقا د دې لوبي په ګټلو سره د چمپنیز ټرافي نیمه پایلوبو ته لاره پیدا کړه چې ورسره افغانستان د مخکې تګ ضعیف چانس هم له لاسه ورکړ.
د دې سیالۍ پچه انګلستان وګټله او د لومړۍ توپوهنې پریکړه یې وکړه. انګلستان په ۳۹ اوور کې ۱۷۹منډې وکړې او ټول لوبغاړي یې وسوځیدل.
جنوبي افریقا د درېیو لوبغاړو په سوځېدلو سره په ۳۰ اوور کې ټاکل شوی هدف پوره کړ او لوبه یې د ۷ لوبغاړو په توپیر وګټله.
د جنوبي افریقا لوبغاړی مارکو جانسین د درېیو انګلستاني لوبغاړو د سوځولو او د درېیو کیچونو د ترلاسه کولو له کبله د لوبې غوره لوبغاړی ونومول شو.
له دې سیالۍ وړاندې افغانستان او جنوبي افریقا درې – درې پواینټونه درلودل او د جنوبي افریقا د ماتې په صورت کې افغان لوبډلې نیمه پایلوبو ته د تللو ډېر ضعیف چانس درلود خو په نننۍ سیالۍ کې د انګلستان په ماتولو سره د جنوبي افریقا پواینټونه پنځو ته پورته شول او نیمه پایلوبو ته یې لاره پیدا کړه.
هندوستان، نیوزیلند او استرالیا له دې وړاندې د چمپینز ټرافي نیمه پایلوبو ته وتلي و او سبا د یکشنبې په ورځ مارچ دویمه به د نیوزیلیند او هندوستان ترمنځ لوبې وروسته به څرګنده شي چې کومې لوبډلې په نیمه پایلوبو کې سره مخامخ کېږي.
فورم \ دبحث خونه