د لاس رسي وړ اتصالات

د افغانستان او استرالیا د کرکټ لوبه د باران له کبله لغوه شوه


د پاکستان په لاهور کې د افغانستان او استرالیا ترمنځ لوبه د باران له کبله بشپړ نه شوه.
د پاکستان په لاهور کې د افغانستان او استرالیا ترمنځ لوبه د باران له کبله بشپړ نه شوه.

د کرکټ په چمپینز ټرافي کې د جمعې په ورځ، فبروري ۲۸ (کب ۱۰) د افغانستان او استرالیا ترمنځ لوبه د باران له کبله لغوه شوه.

د پاکستان په لاهور کې افغانستان د پچې له ګټلو وروسته افغانستان په ۵۰ اورونو کې مقابل لوري ته د ۲۷۴ منډو هدف وټاکه.

استرالیا په ځواب کې په ۱۲.۵ اورونو کې د یو لوبغاړي په سوځېدو ۱۰۹ منډې کړې وې چې لوبه د باران له کبله وځنډېده.

که څه هم باران وروسته ودرېد خو د لوبغالي د لوندوالي له کبله لوبڅارونو ددې لوبې د لغوه کېدو پرېکړه ورکړه او هر ټیم ته یو – یو پواینټ ورکړل شو.

په دې لوبه کې د افغانستان پرانیستونکي توپ وهونکي رحمت الله ګربز په صفر او ابرهیم ځدران له ۲۲ منډو کولو وروسته وسوځېدل.

ابراهیم ځدران وړمه ورځ د انګلنډ سره د افغانستان په لوبه کې وتوانېد چې په ۱۴۶ توپونو ۱۷۷ منډې وکړې. دا د چمپینز ټرافي په تاریخ کې د یو لوبغاړي لخوا په یوه لوبه کې ترټولو زیاتې منډې دي.

په نننۍ لوبه کې د افغانستان صدیق الله اتل ۸۵ منډې وکړې. عظمت الله عمرزی د ۶۷ منډو کولو وروسته وسوځېد.

د استرالیا توپ اچوونکي بین ډوارشیوس درې لوبغاړي او اډم زمپا او سپینسر جانسن دوه - دوه لوبغاړي وسوځول.

د چمپینز ټرافي له بي ګروپ څخه استرالیا له څلور پواینټونو سره نیمه پایلوبو ته رسېدلی. جنوبي افریقا او افغانستان درې – درې پواینټه لري او انګلنډ له وړاندې تګ څخه پاتې شوی.

په دغه ګروپ کې وروستۍ یوه لوبه د جنوبي افریقا او انګلنډ ترمنځ ده چې له مخې به یې معلومه شوي چې د افغانستان، جنوبي افریقا او انګلنډ ترمنځ کومه لوبډله نیمه پایلوبو ته رسیږي.

په اې ګروپ کې هند او نیوزیلنډ له څلور – څلور پواینټونو سره نیمې پایلوبې ته وتلي او کوربه پاکستان او بنګله دېش له وړاندې تګ څخه پاتې شوي.

فورم \ دبحث خونه

XS
SM
MD
LG