په ایران کې چارواکي وايي چې ددغه هېواد په جنوب ختیځ کې د غلو او شوکمارو سره په یوې نښته کې شپږ شوکمار او درې د نیمه پوځي ځواک غړي وژل شوي دي.
چارواکي وايي د «بسیج» په نامه د دغه نیمه پوځي ځواک سرتېري د ایران د انقلابي ګارد له ځواکونو سره تړاو لري.
د ایران انقلابي ګارد په خپل ویبسایټ «سپاه» کې تېره ورځ ناوخته جنورۍ لومړۍ (مرغومې۱۱) لیکلي دي چې دا پېښه د سیستان-بلوچستان په ایالت کې د شوکمارو یو پټنځای ته نژدې شوې ده.
په پېښه کې د نیمه پوځي ځواک پنځه غړي ژوبل شوي هم دي او په دې اړه لا څوک نه دي نیول شوي.
د ایران سیستان-بلوچستان ایالت چې له پاکستان او افغانستان سره سرحد کې نژدې دی، له قاچاقبرو، بلوڅ بیلتون غوښتونکو او نورو اورپکو سره د جکړې ځای بلل کیږي.
د جمعې په ورځ د ایران انقلابي ګارد وویل هغه کسان یې وژلي چې د تېرکال د ډسمبر په ۲۵ نېټه د سیستان-بلوچستان په ایالت کې د هغوی د دوو سرتېرو په وژلو کې دخیل وو.
د فرانسې خبري اژانس وايي چې د نومبر په ۱۶ نېټه د دغه ایالت په سرحد کې له یوې وسله والې ډلې سره په جګړې کې هم درې پولیس ووژل شول او شپږ نور ژوبل شول.
په وروستیو کلونو کې د ایران د سیستان-بلوچستان په ایالت کې تر ټولو فعاله جهادي ډله «جېش العدل» ده چې په یو لړ مهمو ځایونو کې یې چاودنې کړې او یو شمېر خلک یې تښتولي دي.
د ۲۰۱۹ د فبرورۍ په میاشت کې په یو ځانمرګي برید کې د ایران د انقلابي ګارد ۲۷ تنه ووژل شول.
