ایراني مقاماتو ویلي دي چې د سعودي عربستان د جدې بندر ته نژدې په سره بحیره کې د ایران د تیلو په یو ټانکر د دوو توغندیو برید شوی دی.
د ایران دولتي اژانس رپوټ ورکړی چې دغه تیل لیږدونکې بېړۍ د توغندیو د برید پر وخت د جدې بندر په جنوب لویدیځ ١٣٠ کیلومترۍ کې وه.
ایراني مقاماتو ندي ویلي چې دغه برید چا کړی دی.
سعودي عربستان هم تر اوسه پدې هکله نظر ندی څرگند کړی.
د رپوټونو له مخې ددغو توغندیو په وجه رامنځ ته شوې چاودنه په بېړۍ کې د اور لگیدو سبب شوی ندی او چاته پدغه برید کې د تاوان رسیدو خبر هم ندی ورکړل شوی.
دا د خلیج په اوبو کې د تیلو د لیږدونکو بیړیو (ټانکرونو) د تگ راتگ په اړه د کړکیچ یوه تازه پیښه ده.
د فارس په خلیج کې د وروستیو میاشتو تاوتریخوالیو په وجه د امریکا د متحده ایالاتو او ایران ترمنځ کړکیچ نور هم زیات شوی دی.
د امریکا سمندري ځواکونو ویلي چې د ایران د تیلو په ټانکر کې د چاودنې اړوند رپوټونو نه خبر دي، خو پدې اړه یې د مشخص نظر څرگندولو نه ډډه کړې ده.
ددغه خبر د خپریدو وروسته د تیلو بیه په سلو کې دوه فیصده لوړه شوې ده.
