د ایران روحاني مشر ایات الله علي خامنه یي شنبه مارچ اتمه ( کب ۱۸) د دې هیواد اتومي پروګرام په هکله د متحده ایالاتو د جمهور رئیس ډونالډ ټرمپ د خبرو بلنه رد کړله ځکه د هغه په قول د خبرو هدف په ایران باندې د نورو بندیزونو لګول او د توغندیو پروګرام محدود کول دي.
د خامنه يي دې څرګندونو څخه یوه ورځ وړاندې جمهور رئیس ټرمپ ویلي و چې د ایران ستر روحاني مشر ایات الله علي خامنه یي څخه یې په یو لیک کې غوښتي چې د اټومي پروګرام په هکله تازه خبرو ته حاضر شي.
ښاغلي ټرمپ په سپینې ماڼۍ کې خبریالانو سره په خبرو کې دا خبرداری هم ورکړ که ایران خبرو ته حاضر نه شي، ښایي د نظامي اقدام څخه به کار واخلي.
ټرمپ پرته له دې چې نور جزیات ورکړي وویل چې د ایران سره د اتومي پروګرام په هکله "په وروستۍ شیبې کې یو".
خامنه يي چې د شنبې په ورځ یې یو شمیر حکومتي چارواکو سره خبرې کولې، د امریکا د جمهور رئیس د لیک یادونه یې ونکړه او پرته له دې چې د متحده ایالاتو نوم واخلي ویي ویل چې د "بدماشي کوونکي حکومت" لخوا په خبرو ډیر ټینګار کیږي.
سره له دې چې جمهور رئیس ټرمپ ویلي د ایران سره د اتومي پروګرام پر سر تړون کول غواړي خو تر څنګ دا خبرداری هم ورکړی چې که ایران موافقې ته حاضر نه شي، پر ضد یې نظامي اقدام اخیستل کیدی شي.
خامنه يي په دې هکله وویل، "د هغوي خبرې د ستونزې د حل د هدف لپاره نه دي، بلکې غواړي چې په مقابل لوري هغه څه وتپي چې غواړي يي."
د ایران روحاني مشر په دې هکله معلومات ورنه کړل چې آیا د ټرمپ لیک یې تر لاسه کړی او که نه خو زیاته یې کړه چې د متحده ایالاتو غوښتنې ښایي د ایران نظامي کړنو او په سیمې کې د دې هیواد نفوذ کمولو په هکله وي.
هغه زیاته کړه، " خبرې به د نظامي دفاعي او زمونږ د هیواد نړیوالو اړتیاوو په هکله وي. هغوي به له ایران وغواړي چې د ځینو کسانو سره ونه ګورو، ځینو ځایونو ته ولاړ نشو، بعضي شیان تولید نکړو او دا چې ستاسو د توغندیو واټن به معلوم وي. آیا دا امکان لري چې یو څوک یې ومني؟"
د خامنه يي همدې څرګندونو په غبرګون کې د سپینې ماڼۍ د ملي امنیت شورا سلاکار، برایان هیوز د امریکا غږ فارسي څانګې ته وویل چې ښاغلي ټرمپ ایران ته په واضح توګه اعلان کړی چې دوه لارې ورته شته دي چې یوه یې موافقه کول دي او بله یې نظامي اقدام دی.
ښاغلي بریان زیاته کړه، " هیله مند یو چې د ایران رژیم د ترهګرۍ پر ځای خپل ولس او ملي ګټې غوره وګڼي".
تر خامنه يي وړاندې د ایران د بهرنیو چارو وزیر، عباس عراقچي هم تیره ورځ ویلي وو چې هیواد یې تر څو چې امریکا د اعظمي فشار پالیسي څخه کار اخلي، د اتومي پروګرام په هکله به خبرې ونه کړي.
د ایران دې تر ټولو لوړ پوړي دیپلومات د سعودي عربستان د جدې په ښار کې د اسلامي همکارۍ سازمان غونډې په یو جلا مجلس کې خبرداری ورکړی چې د دې هیواد اتومي پروګرام د نظامي عملیاتو د لارې نشي له منځه وړل کړی.
هغه په دې هکله وویل، "دا یوه ټکنالوژي ده چې مونږ تر لاسه کړې. ټکنالوژي په مغزو کې ده او بمباري پرې نه شي کیدی."
سره له دې چې امریکایي چارواکي وایي که ایران وغواړي یوازې په څو اوونیو کې اتومي وسلې جوړولی شي خو ایران تل ټینګار کړی چې اتومي پروګرام یې یوازې د سوله ایزو مقاصدو لپاره دی.
په عین حال کې علي خامنه یي چې د ایران په هرې بهرنۍ پالیسۍ کې د ورستۍ پریکړې واک لري، ویلي چې په متحده ایالاتو باندې باور نه شي کیدی.
فورم \ دبحث خونه