د چرسو نه د طبي محصولاتو صادرات به د اسرائیلو دولت ته په کال کې سلګونه میلیون ډالر عواید برابر کړي.
د اسرائیلو پارلمان هغه قانون ته د تایید رایه ورکړه چې بزګرو ته د چرسو د کرلو اجازه ورکوي.
د دغه قانون له مخې به بزګران د چرسو (مروانا) د کرولو لپاره باید د روغتیا وزارت جواز ولري. پولیس به هم د چرسو د کرکیلي بهیر څاري.
اټکل کیږي چې له چرسو نه جوړ شوي درمل به د اسرائیلو دولت ته په کال کې شاوخوا ۲۶۵ میلیون ډالره عواید برابر کړي.
دا مهال په اسرائیل کې د چرسو د تولید ۸ کمپنۍ شته او ګڼ شمیر نورې یې لا د جواز اخیستلو ته انتظار باسي.
اسرائیل په ۲۰۱۶ کال کې په روغتیایي برخه کې د چرسو کښت او کارولو ته اجازه ورکړې وه.
د نړۍ یو شمیر هیوادونو یوازې د درملو جوړولو لپاره د چرسو او کوکنارو کرهنه قانوني کړې ده خو د کاناډا او هالڼد په څیر ځینو نورو بیا آن د چرسو څکول او تفریحي کارونه هم آزاده کړې ده.