د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد یو ځل بیا په افغانستان کې د ښکېلو اړخونو لخوا د تاوتریخوالي کمېدو غوښتنه کړې ده.
ښاغلي خلیلزاد د دوشنبې په ورځ سپټمبر ۲۱ (وږې ۳۱) پر خپل ټویټر پدې هیواد کې د تاوتریخوالي زیاتیدل د تاسف وړ وګڼل او وویل چې پدغو جګړو کې د ملکي وګړو په ګډول زیات شمیر افغانان وژل کیږي.
ښاغلي خلیلزاد وویل: «په داسې حال کې چې د سولې بین الافغاني مذاکرات پیل شوي باید ټولې خواوې تاوتریخوالی کم کړي.»
د افغان سولې لپاره د امریکا ځانګړي استازي تېره ورځ هم بین الافغاني مذاکرات د افغانستان لپاره یوه بې سارې شېبه بللې وه او له دغه فرصت څخه یې د ګټې پر اخیستو ټینګار کړی و.
بلخوا په افغانستان کې د کاناډا سفارت هم د سولې بهیر هر کلی کړی او د ښکېلو اړخونو څخه یې د اوربند ټينګېدو غوښتنه کړې ده.
په افغانستان کې پر داسې مهال له ښکېلو اړخونو څخه د تاوتریخوالي کمېدو او اوربند ټینګېدو غوښته کیږي چې په دې وروستیو ورځو کې د سړک غاړې ماینونو، مخامخ نښتو او هوايي بریدونو کې د وسله والو طالبانو او افغان امنیتي ځواکونو ترڅنګ د ګڼو ملکي وګړو د مرګ ژوبلې راپورونه هم ورکړل شوي دي.
وړمه ورځ په پکتیکا او بلخ ولایتونو کې د سړک غاړې ماین چاودنو له امله ۲۶ تنو ملکي وګړو ته مرګ ژوبله واوښتله.
په همدې ورځ په پکتیکا ولایت کې د سړک غاړې ماین چاودنې له امله د دغه ولایت د امنیت امر اصف توخی له یو شمېر نورو پولیسو سره هم ووژل شو.
بلخوا وړمه شپه په کندز ولایت کې د افغان ځواکونو د هوايي برید پر مهال د وسله والو طالبانو ترڅنګ د ملکي خلکو د مرګ ژوبلې په اړه هم راپورونه ورکړل شوي، خو دفاع وزارت ویلي چې په دغه برید کې یوازې طالبان وژلي دي.
ولسمشر غني بیا د تیرې شنبې په ورځ په یوې اعلامیې کې له طالبانو څخه وغوښتل چې د سولې خبرو مطلوبې پایلې ته رسېدو لپاره باید اوربند ومني.
