کندز کې امنیتي چارواکي وایي، د دغه ولایت د ملي امنیت رئیس محمد جسیم انوري، په موټر نن سهار وختي وسله والو ډزې کړي چې له امله یې هغه ټپي شوی، خو روغتیایي حالت یې ښه دی.
د کندز د ملي امنیت د رئیس محمد جسیم انوري پر موټر هغه وخت ډزې وشوې چې هغه د کابل - کندز په لویه لار د ګزمې په حال کې وو.
د پولیسو د سپین زر ۸۰۸ زون قوماندان شیرعزیز کاموال وايي چې نن سهار وختي د ملي امنیت رئیس محمد جسیم انوري د ښار په لارو کې په ناڅاپي ډول ګزمه کوله، خو کله د ده د ګزمې موټر د سه درک له ساحې څخه لریوځي، د وسله والو له خوا پرې ډزې کیږي.
کاموال وویل چې د ملي امنیت رئیس محمد جسیم انوري ددغه برید په نتجه کې ټپي شوی دی.
خو جنرال کاموال وویل چې د هغه صحي وضعه ښه ده او د تداوۍ لپاره د مزار شریف نظامي کمپ ته انتقال شوی دی.
تراوسه د افغانستان ملي امنیت ریاست د محمد جسیم انوري ټپي کیدلو په باب څه نه دي ویلي.
شیرعزیز کاموال زیاته کړه چې د کندز د ملي امنیت رئیس به د امنیتي حالاتو د څیړلو لپاره له ساتونکي او تعقیبي موټرو پرته په سیمه کې په شخصي جامو کې ګزمې کولې.
په کندز کې پخوا تر دې هیڅ امنیتي مسول له ساتونکیو پرته سفر نه دی کړی. اوس هم زیات شمیر چارواکي چې نورو ولایتونو ته سفر کوي د یو نظامي کتار له خوا بدرکه کیږي.
د بغلان په دډنډ غوري د طالبانو برید
د بغلان په ولایت کې سیمه ایز چارواکي وایي، چې طالبانو نن سهار د دغه ولایت د د ډنډ غوري پر ولسوالۍ ډله ایز برید وکړ.
د بغلان والي ستار بارز ددغې جګړې په هکله امریکا غږ اشنا راډیو ته وویل، چې طالبانو په دغه ولایت کې د امنیت د ګډوډولو په لټه کې دي، چې د همدې له امله یې پر د ډنډ غوري ډله ایز برید کړی دی.
د بغلان والي وویل، سیمې ته اضافي ځواکونه رسیدلي او د وسله والو د ځپلو لپاره یې عملیات پیل کړي دي.
د طالبانو یو ویاند ذبیح الله مجاهد د خپل ټویټر په پاڼه لیکلي چې د دغې ډلې وسله والو په نننیو جګړو کې د افغان ځواکونو یوه قرارګاه او پنځه پوستې نیولي دي.
همداشان ذبیح الله مجاهد ویلي، چې دغه ولسوالۍ کې شل پولیس هم له دوی سره یوځای شوي دي.
د بغلان ولایتي چارواکي د طالبانو ادعا نه مني، خو وایي، چې جګړه لا هم دوام لري.
د بغلان د ولایتي شورا یو غړي امریکا غږ ته وویل، چې طالبانو په د ډنډ غوري ولسوالۍ کې له افغان ځواکونو دوه پوستې نیولي دي.
د تیر یو کال راهیسې طالبان د ډنډ غوري په ولسوالۍ کې فعال حضور لري.
