د امریکا د متحده ایالاتو د مدني غورځنگ د مشر مارتین لوترکینگ د وژنې نه ٥١ کاله تیر شول او امریکایان د دوشنبې په ورځ (جنورۍ ٢١) پداسې حال کې د مدني حقونو ددغه مشر یادښت کوي چې د نژادي برلاسيتوب له درکه اندیښنې زیاتې شوي دي.
د امریکا جمهور رئیس دونالد ټرمپ په ټویټر باندې د یوې لنډې ویدیو په خپرولو سره لیکلي دي چې د مارتین لوترکینگ د یادگاري څلي لیدل ورته ستر ویاړ و.
هر کال د جنورۍ د میاشتې دریمه دوشنبه په متحده ایالاتو کې د برابرۍ او توپیر د له منځه تللو لپاره د عدم خشونت په بنسټ د ښاغلي کینگ د مبارزو یادونه او درناوی کیږي.
ډاکتر کینگ په ١٩٥٠ او ١٩٦٠ لسیزو کې د امریکایي تورپوستانو پر وړاندې د نژادي توپیر پر ضد او تورپوستو امریکایانو ته د رای ورکولو د حق د ترلاسه کولو لپاره مبارزه وکړه.
د امریکا د مدني حقونو د غورځنگ ددغه مشر شهرت او محبوبیت په ١٩٥٥ کال کې هغه وخت اوج ته ورسید چې د امریکا د الاباما ایالت په مونتگمري ښار کې په ښاري بسونو کې د سپین پوستو سره د تورپوستو پر ناستې باندې د بندیز پر وړاندې ودرید او په بریالیتوب سره یې ددې ښار ښاروالۍ مجبوره کړه چې دغه تبعیض ته د پای ټکی کیږدي.
مارتین لوترکینگ د ١٩٦٣ کال د مارچ په میاشت کې په واشنگټن ډي سي کې مشهوره وینا وکړه چې عنوان یې و "زه یو خیال لرم". دغې وینا ته ٢٥٠ زره تورپوستي او سپین پوستي امریکایان راټول شوي وو چې هغه یې د مدني حقونو د غورځنگ محوري شخصیت کړ.
ښاغلي کینگ په ۱۹۶۴ کال کې د نوبل د سولې جایزه ترلاسه کړه، په همدې کال کې د امریکا د هغه وخت د جمهور رئیس لیندن جانسن له لورې د مدني حقونو لایحه لاس لیک شوه.
د امریکا د مدني حقونو د غورځنگ مشر د ۱۹۶۸ کال په اپریل کې په ٣٩ کلنۍ کې پداسې حال کې ووژل شو چې د تورپوستو کارگرانو د اعتصاب سره د مرستې لپاره تللی و.
د ډاکتر لوتر کینگ له وژل کیدو نه څلور ورځې وروسته د امریکا د استازو د مجلس یو غړي وړاندیز وکړ چې د کال پوه ورځ د هغه د درناوي لپاره عمومي رخصتي شي.
خو دې کار ١٥ کاله وخت ونیو تر څو د میلیونو امریکایانو د پرله پسې غوښتنو وروسته د متحده ایالاتو کانگرس په ١٩٨٣ کال کې د ښاغلي کینگ په یادښت یوه ورځ عمومي رخصتي ومنله او د هغه وخت جمهور رئیس رونالد ریگن هغه لاس لیک کړه.