د افغانستان د دفاع وزارت وايي، چې په بلخ ولایت کې د ملي اردو یو بیس ته نږدې د موټربم برید له امله د پوځ شپږ سرتیري وژل شوي دي.
د دغه وزارت مرستیال ویاند فواد امان د پنجشنبې په ورځ د ډیسمبر ۲۶مه (مرغومي ۵مه) امریکا غږ ته وویل، چې پېښه نن سهار شاوخوا ۴:۳۰ بجې د بلخ ولایت په بلخ ولسوالۍ کې شوې ده.
د ښاغلي امان پر وینا په دې برید کې د ملي اردو درې سرتیري ټپیان شوي هم دي.
د افغانستان دفاع وزارت د برید مسولیت د وسلهوالو طالبانو په غاړه اچولی او ویلي یې دي، چې د پېښې څرنګوالي په اړه پلټنې پیل شوي دي.
د برید مسولیت تر اوسه په رسمي ډول کوم چا یا ډلې نه دی منلی.
په تېره یوه اونۍ کې په بلخ ولایت کې د افغان ځواکونو د مرګژوبلې کچه لوړه شوې ده.
دوه ورځې وړاندې هم د دغه ولایت په دولت آباد ولسوالۍ کې د افغان ځواکونو پر یوې پوستې د طالبانو د برید په نتیجه کې اوه سرتیري ووژل شول او شپږ نور ټپیان شول.
