په داسې حال کې چې ټاکل شوې د راتلونکې سه شنبې په ورځ د متحده ایالاتو پخوانی جمهور رئیس دونالډ ټرمپ د نیویارک په ښار کې محکمې ته حاضر شي، د دې ښار پولیسو د ټرمپ ټاور او منهاټن ناحیې جنایي محکمې شاوخوا سړکونه بند کړي او د اوسپنو خنډونه یې ځای پر ځای کړیدي.
ټرمپ به سه شنبه محکمې ته حاضر شي چې پرې لګیدلي تورونه واوري. هغه د متحده ایالاتو لومړنی پخوانی جمهور رئیس دی چې د جنایي تورونو سره مخ کیږي او دا تور پرې دی چې د بربنډو فلمونو یوې کارکوونکې ته یې د ۲۰۱۶ کال د جمهوري ریاست انتخاباتو پر مهال نغدې پیسې ورکړي.
د استازو مجلس یو غړي په ګډون د مخکني جمهور رئیس پلویانو ویلي چې د سه شنبې په ورځ به د نیویارک په ښار کې مظاهرې وکړي.
په همدې حال کې د نیویارک ښاري محکمې ویلي چې د ټرمپ د راتګ څخه وړاندې به د دې محکمې ځینې څانګې بندې وي.
پداسې حال کې چې د ټولنیزو شبکو ځینو کاروونکو د نیویارک ایالت د منهاټن ناحیې د څارنوال الوین براګ او هغه منصفه هیئت چې په ښاغلي ټرمپ یې په رسمي توګه تورونه لګولي، اعدام کیدل غوښتي خو د نیویارک د پولیسو څانګې ویلي چې ښار ته کوم ګواښ ندی متوجه.
د ۲۰۲۰ کال د جمهوري ریاست انتخاباتو څخه وروسته، ټرمپ یې نتایج ونه منل، د هغه پلویانو د کانګرس په ماڼۍ برید وکړ.
دا ځل هم ښاغلي ټرمپ د خپلو پلویانو څخه د مظاهرو غوښتنه کړې خو ګڼ شمیر پلویانو یې اندیښنه ښودلې چې ښایي وبه نیول شي او له همدې کبله یې د مظاهرو په هکله د احتیاط غوښتنه کړې.
دونالډ ټرمپ تیره اوونۍ پخپلې Truth Social شبکې کې هم د خپلو پلویانو څخه د مظاهرو غوښتنه کړې وه. هغه لیکلي و، "مخکښ جمهوري غوښتونکی کاندید او د متحده ایالاتو پخوانی جمهور رئیس به د راتلونکې اوونۍ د سه شنبې په ورځ ونیول شي." ټرمپ پخپلو پلویانو غږ کړی چې "مظاهره وکړئ، خپل ملت بیرته واخلئ"
بل پل بیا د نیویارک پولیسو ویلي چې د هر ډول حالت ځواب ویلو ته چمتو دي او ډاډ ورکوي چې هر څوک کولی شي په سوله ایزه توګه خپل حقونه عملي کړي.
د ډونالډ ټرمپ یو سلاکار هم ویلي چې ټاکل شوې هغه به دوشنبې د فلوریډا ایالت څخه نیویارک ته ولاړ شي او شپه په ټرمپ ټاور کې تیره کړي او د سه شنبې په سهار به محکمې ته حاضر شي.
