مقامات وایي یو بریدگر وروسته له هغې ووژل شو چې د امریکا د فلوریډا په ایالت کې د امریکا د سمندري ځواکونو په اډه کې ډزې وکړلې.
پدغه پیښه کې د برید ګر تر څنګ یو بل تن هم وژل شوی او څو تنه نور ټپیان شوي دي. د قربانیانو هویت تر اوسه ندی څرگند شوی.
ددغې نښتې وروسته د امریکا د سمندري ځواکونو اډه د څو ساعتو لپاره تړلې وه.
د امریکایي رسنیو د رپوټونو له مخې پدغه اډه کې ١٦ زره پوځیان او څه دپاسه اوه زره غیرپوځي کارکوونکي کار کوي.
هغه ځای چې ډزې په کې شوي د امریکا د سمندري ځواکونو د مقدماتي زده کړو یو مرکز دی. مقاماتو تر اوسه ددغې نښتې د انگیزې په اړه څه ندي ویلي.
د سپینې ماڼۍ مطبوعاتي دفتر ویلي چې جمهور رئیس ډونالډ ټرمپ په پیښه خبر دی او هغه حالات له نږدې څاري.
دا د امریکا د سمندري ځواکونو په اډه کې په روانه اونۍ کې د ډزو دوهمه پیښه ده.
د چهارشنبې په ورځ هم د هاوایي ایالت د پرل هاربر په سمندري اډه کې دوه تنه وژل شوي او درې نور ټپیان شوي وو. بریدگر بیا د پیښې په ځای کې ځان وواژه.