د افغانستان جمهوري ریاست وايي، جمهور رئیس محمد اشرف غني د یو لوړپوړې دولتي پلاوي په مشرۍ پر جوادیه جومات د تروریستي برید د قربانیانو له کورنیو سره د غمشریکۍ په موخه نن د جمعې په مازیګر له کابل څخه د هرات ولایت ته تللی دی.
ارګ په یو بیان کې ویلي چې ټاکل شوې جمهور رئیس غني به د جوادیه جومات د تروریستي پېښې د قربانیانو له کورنیو سره د کتلو سربیره د روباټ جوړونکي ټیم له غړې فاطمې قادریان سره چې د جوادیه جومات په تروریستي پېښه کې یې پلار له لاسه ورکړې هم په جلا توګه وګوري او کورنۍ ته به یې خپله خواخوږي څرګنده کړي.
د تیرې سه شنبې په شپه د هرات د جوادیه پر جومات په برید کې چې مسولیت یې د اسلامي دولت ډلې یا داعش په غاړه اخیستی د روباټ جوړونکي ټیم د غړې فاطمې قادریان د پلار په ګډون ۳۱ تنه وژل شوي او له ۴۰ زیات نور ټپیان شوي دي.
د افغانستان جمهوري ریاست وايي، جمهور رئیس غني به هرات ولایت ته د سفر په ترڅ کې د دغه ولایت امنیتي وضعیت هم وارزوي.
همداشان جمهور رئیس غني به په دې سفر کې د هرات والي سره پر لیدنې سربېره ۲۰۷ ظفر قول اردو ته ولاړ شي او هلته به د دې ولایت له ملکي او پوځي مقاماتو سره په امینتي غونډه کې د سویل لویدیځې حوزې په ځانګړي ډول د هرات ولایت امنیتي حالت وڅیړي.
په هرات کې خبریالان وايي د دغه ولایت چارواکو او مخورو سره د جمهور رئیس غني غونډو ته خبریالان نه دي بلل شوي.