سعودي عربستان او کویټ د پنجشنبې په ورځ اګسټ دریمه (زمري ۱۲) وویل چې د ګازو هغه لانجمنه ساحه د دوی مالکیت دی چې ایران یې د ملکیت ادعا کړې او ویلي یې دي چې پدې ساحه کې به د ګازو سپړنو ته دوام ورکړي.
دغه سمندري ساحه چې په ایران کې د آرش په نوم او په کویټ او سعودي عربستان کې د دورا په نوم پیژندل کیږي، له اوږدې مودې راهیسې ددغو دریو هیوادونو ترمنځ د شخړې اصلي نقطه ده.
کویټ او سعودي چارواکو د پنجشنبې په ورځ په یوه ګډه اعلامیه کې وویل چې، "یوازې دوی په دې سیمه کې د زیرمو د استخراج بشپړ حق لري."
د سعودي د رسمي خبري اژانس (SPA) له خوا په خپره شوې اعلامیه کې راغلي، چې د خلیج دوو عربي هیوادونو د مسئلې د حل لپاره د خپلو سمندري سرحدونو د ټاکلو په خاطر "د ایران اسلامي جمهوریت ته خپلې پخوانۍ او تکراري غوښتنې تازه کوي چې خبرې وکړي."
ایران او کویټ له څو کلونو راهیسې د خپلې لانجمنې سمندري سرحدي سیمې په اړه چې د طبیعي ګازو بډایه زیرمې لري، ناکامې خبرې کړې دي.
د خبرو اترو د بیا پیلولو لپاره وروستۍ هڅې ناکامې شوې او د ایران د تېلو وزیر د یکشنبې په ورځ ویلي، چې تهران ښایي له موافقې پرته هم په دې ساحه کې د سپړلو کار ته دوام ورکړي.
د شانا په نامه د ایران یو رسمي خبري اژانس ددې هیواد د تېلو د وزیر جواد اووجي له قوله ویلي، "که چېرې د تفاهم او همکارۍ لېوالتیا نه وي...ایران به په سیمه کې د استخراج او اکتشاف په اړه خپل حقونه او ګټې تعقیب کړي".
تیره میاشت، وروسته له هغه چې تهران وویل، په ساحه کې د کېندنو پیل کولو ته چمتو دی، کویټ ایران ته د سمندري پولو د بل پړاو خبرو اترو بلنه ورکړه.
څو اونۍ وروسته، عربي سکای نیوز د کویټ د تېلو وزیر سعد البراک له قوله وویل چې هیواد به یې هم له ایران سره د حد بندۍ تړون ته له انتظار پرته د ګازو په ساحه کې "کیندې او تولید" پیل کړي.
ددې ساحې پر سر مخالفت ۱۹۶۰ لسیزې ته رسیږي، کله چې ایران او کویټ یو بل ته په ساحلي ساحو کې د ګازو د استخراج لپاره امتیازات ورکړل.
د ګازو دغه دوه ساحې په شمالي برخه کې یو له بل سره یوځای شوي او د ګازو زیرمې یې شاوخوا ۲۲۰ میلیارد متر مکعب اټکل شوي دي.
تېر کال، کویټ او سعودي عربستان ددې ګډې ساحې د پراختیا لپاره د ایران له اعتراضونو سره سره چې دا کار یې "غیر قانوني" بللی و، یو تړون لاسلیک کړ.
فورم \ دبحث خونه