د افغانستان د بیا رغونې لپاره د امریکا د متحده ایالاتو د سرمفتش دفتر "سیګار" د ملګرو ملتونو په ګډون د بشري مرستو د رسولو د ادارو په فعالیتونو کې د طالبانو د حکومت مخ په زیاتیدونکي ډول د لاس وهنو خبر ورکړی دی.
سیګار د پنجشنبې په ورځ جون ۲۹ ( چنګاښ اتم) په څو پرله پسې ټویټونو کې ویلي، چې ملګرو ملتونو د تیر ۲۰۲۲ کال د نومبر د ۱۶ څخه د روان ۲۰۲۳ کال د فبرورۍ تر میاشتې د بشري مرستو رسونې د ادارو په چارو کې ۴۹۴ لاس وهنو په اړه راپور ورکړی دی.
سیګار ویلي، چې ملګرو ملتونو د ۲۰۲۱ نومبر او ۲۰۲۲ د فبرورۍ ترمنځ موده کې ۱۵۳ دغسې پیښې ثبت کړې وې.
همداشان د افغانستان د بیا رغونې لپاره د امریکا د متحده ایالاتو د سرمفتش دفتر ویلي، چې ملګرو ملتونو تیر۲۰۲۲ کال کې د مرستو رسونې د ادارو په فعالیتونو کې د طالبانو د حکومت ۸۴ بروکراتیکي موانعو، لاس وهنو او د مرستو رسونې د ادارو سره د تفاهم لیکونو د لاسلیکولو په برخه کې د فشار د راوړلو په اړه پیښې ثبت کړي دي.
سیګار ویلي، چې دا تفاهم لیکونه "دغیر دولتي موسسو په فعالیتونو کې د طالبانو د برخې اخیستلو لکه د طالبانو د چارواکو سره د معلوماتو د شریکولو، طالبانو سره د همغږۍ رامنځ ته کولو د پلان جوړولو او د پلان د تطبیق په برخو کې د همغږۍ رامنځ ته کولو" اړوند مسایلو په تړاو و.
د روان کال د اپریل په میاشت کې طالبانو د ملګرو ملتونو په دفترونو کې د افغان میرمنو په کار بندیز ولګوه، چې دا بندیز ددې سبب شو، چې ملګري ملتونه د مۍ د میاشتې تر پنځمې ورځې پورې افغانستان کې خپل فعالیتونه وځنډوي.
د ملګرو ملتونو عمومي منشي انتونیو ګوتیرش د مۍ د میاشتې په دوهمه ورځ وویل، چې د طالبانو له خوا د ملګري ملتونو په ادارو کې د افغان میرمنو په کار د بندیز سره سره به په افغانستان کې خپلو فعالیتونو ته دوام ورکړي.
د روان ۲۰۲۳ کال د جنورۍ په میاشت کې د ملګرو ملتونو د بشري مرستو د همغږۍ دفتر "اوچا" په یو راپور کې وویل، چې د مرستو د رسونې په چارو کې د طالبانو د لاس وهنو له امله یې ۲۷۲ پروګرامونه ځنډولي دي.
د طالبانو حکومت د تیر ۲۰۲۲ کال د ډسمبر د میاشتې په وروستۍ اونۍ کې په غیر دولتي موسسو کې د افغان میرمنو او نجونو په کار بندیز ولګوه.
طالبانو د روانې میلادي میاشتې جون کې هغو نړیوالو ادارو ته، چې د پوهنې په سکټور کې فعالیت کوي امر وکړ، چې تر څو اونیو پورې دې خپل فعالیتونه وځنډوي. د وروستیو احتمالي لارښوونو له مخې دا پروژې به د مرستې رسونې ملي ادارو ته وسپارل شي.
ملګرو ملتونو د طالبانو دا اقدام "شاته یو وحشتناک ګام" بللی دی.
همداشان سیګار ویلي، چې په تیر ۲۰۲۲ کال کې یې په افغانستان کې د روغتیايي کارکوونکو پر وړاندې ۳۰ بریدونه ثبت شوي او هم ۳۶۲ نور د تاوتریخوالي او ګواښونو پیښې یې د مرستو رسونې د کارکوونکو، شتمنیو، او بشري مرستو د تاسیساتو پر وړاندې ثبت کړي دي.
د طالبانو حکومت تراوسه د سیګار دغه راپور ته غبرګون نه دی ښودلی، خو ددې وړاندې یې د مرستو رسونې په چارو کې ددغې ډلې هر ډول لاس وهنه رده کړې وه.
