د بدخشان سیمه ییز چارواکي وايي، د دغه ولایت پر ارغجخوا ولسوالۍ د طالبانو تر پراخو بریدونو وروسته یې د یادې ولسوالۍ له مرکز څخه تکتیکي پر شا تګ کړی دی.
د بدخشان د والي ویاند نیک محمد نظري د شنبې په ورځ د «وري میاشتې پر لسمه» امریکا غږ ته وویل، چې تېر شپه پر دغه ولسوالۍ د طالبانو په برید کې ۴ پولیس وژل شوي او څلور نور ټپیان شوي هم دي.
هغه وویل:"د ولسوالۍ پر ودانۍ باندې جګړه شروع ده،امنیتي کسان له ودانۍ څخه وتلي دي او د دې ترڅنګ درې نورې امنیتي پوستې هم سقوط شوي دي."
پر همدې مهال د بدخشان د ولایتي شورا غړي وايي، چې د تېري شپې له ۹ بجو د دغه ولسوالۍ له مسؤلینو سره ټلیفوني اړیکې پرې شوي دي.
د ولایتي شورا غړې طاهره علمیار وویل: "په دغه جګړه کې پنځه امنیتي سرتېري د طالبانو لخوا نیول شوي، ۱۳ وژل شوي او ولسوالي په بشپړه توګه د طالبانو لاسته لوېدلې ده."
پر همدې مهال د افغانستان د کورنیو چارو وزارت ویاند نصرت رحیمي رسنیو ته په لېږلي غږیز کلیپ کې د ارغنجخوا ولسوالۍ د سقوط په اړ ویلي، د دې لپاره چې د زیاتو تلفاتو مخه ونیول شوي افغان ځواکونو له دغه ولسوالۍ څخه وتلي دي.
هغه ویلي:"د دې لپاره ساحه تر ګواښ لاندې وه او د دې لپاره چې افغان امنیتي ځواکونو ته تلفات ونه رسېږي،امنیتي ځواکونو په موقت ډول ساحه پریښې ده."
د کورنیو چارو وزارت همدارنګه ویلي، چې په دغه ولسوالۍ کې د امنیتي ځواکونو د بیا ځای پر ځای کولو کارونه روان دي.
طالبانو هم ویلي چې دغه ولسوالي یې نیولې او د ۱۱ امنیتي سرتېرو د وژلو ادعا یې هم کړې ده.
ارغنجخوا د بدخشان مرکز فیض اباد په ختیځ کې په ۳۵ کیلومترۍ کې پرته ده.
د یادونې وړ ده چې د دغه ولایت وردوج او یمګان ولسوالۍ هم له څو کلونو راپدیخوا د وسله الو طالبانو په لاس کې دي.
تر دې مخکې د دغه ولایت زېباک او کوهستان ولسوالۍ هم طالبانو نیولې وې چې بېرته د افغان ځواکونو لخوا ونیول شوې.
