ټرمپ د ولسمشر په توګه د لوړې وروسته: د امریکا طلايي دوران له نن څخه پیل شو

ډونالډ ټرمپ د متحدو ایالتونو د ۴۷م ولسمشر په توګه لوړه وکړه او په خپله وینا کې یې داسې ټکي یاد کړل چې د خپلې ولسمشرۍ په څلور کلنه دوره کې یې پلي کړي.

ټرمپ د دوشنبې د ورځې، جنوري ۲۰ (سلواغې لومړۍ)، د خپلې وینا په سر کې دا د امریکا "د طلايي دورې" پیل وباله او د "لومړی امریکا" پر سیاست یې ټینګار وکړ. هغه څرګنده کړه چې امریکا ته د غیرقانوني کډوالۍ له مخنیوي نیولې، د نړۍ په سطحه د امریکا د اعتبار د بیا ترلاسه کولو، په حکومت کې د اصلاحاتو د پلې کولو او ګڼې نورې موخې به یې د ولسمشرۍ د دوهمې دورې لومړیتوبونه وي.

د ټرمپ د وینا بشپړ متن دلته ولولئ.

مرستیال ولسمشر جې ډي وینس، د استازو جرګې رئیس جانسن، سناتور تونې، قاضي القضات رابرټس، د متحدو ایالتونو قاضیانو، ولسمشر کلنټن، ولسمشر بوش، ولسمشر اوباما، ولسمشر بایډن او مرستیاله ولسمشره هریس، او ګرانو وطنوالو، د امریکا طلایي دوران سره له نن څخه پیل شو.

سر له نن څخه به، زموږ هیواد پرمختګ کوي او په ټوله نړۍ کې په درنه سترګه ورته کتل کیږي. نور قومونه به زموږ تقلید کوي، او موږ به هیچا ته ددې اجازه ورنکړو چې د ټرمپ د حکومت په دوره کې زموږ له سخاوتمندۍ غلطه استفاده وکړي. ساده ووایم، زه به امریکا ته لومړیتوب ورکوم!

موږ به بیا د خپلې خپلواکۍ اعاده کوو. بیا به د خپل امنیت اعاده کوو. د عدالت میزان به بیا ټینګوو. په حکومت او قضا کې به موجود تعصب، تاوتریخوالی او بې انصافي له منځه وړو. زموږ لومړی لومړیتوب به د یوه باعزته، ودان او خپلواک هېواد جوړول وي. امریکا به ډیر ژر تر ټولو غښتلی، عالي او بې سیاله هیواد شي.

زه یو ځل بیا ولسمشرۍ ته تر پخوا په ډیر اطمینان او خوشبینی راستون شوی یم چې دا ځل تر پخوا په ډیر ستر توپیر بریالی شوی یم. په ټول هېواد کې د بدلون هوا چلیدلې ده. د لمر وړانګې په ټوله نړۍ کې خپرې شوې دي، او امریکا ددې فرصت لري چې له دې شرایطو ښه استفاده وکړي، خو موږ باید په صداقت خپلې ننګونې هم وپیژنو. چیلنجونه ډیر دي خو دغه اوسنۍ بریا به زموږ ننګونې له منځه یوسي.

په متحدو ایالتونو کې، موږ نن په داسې حال کې سره راټول شوې یو، چې زموږ حکومت د بې اعتبارۍ له بحران سره مخ دی. د ډيرو کلونو راهیسي یوې افراطي او فاسدې ادارې د وطنوالو څخه ثروت او قدرت دواړه اخیستي دي، او زموږ د ټولنې ستونونه مات او شړیدلې دي. حکومت مو په داسې حالت کې دي چې خپل یو کورنی ساده بحران نشي حل کولی، او په عین حال کې په ګڼ شمیر نړیوالو بحرانونو کې لالهانده ګرځي. د خپلو قانوني امریکایي وطنوالو په خوندیتوب کې ناکامه دی، خو مجرمینو ته پناه ورکوي چې د نورې نړۍ له زندانونو، او لیونتونونو څخه په غیرقانوني توګه امریکا ته راځي.

موږ یو داسې حکومت درلود چې د نورې نړۍ د سرحدونو د دفاع لپاره یې بې حسابه سرمایه لګوله، خو د امریکا سرحدونه او ولس یې هیر و. هېواد مو داسې حالت ته رسیدلی چې په اضطراري حالاتو کې د خپلو خلکو بنیادي بشري اړتیاوې نشي پوره کولی. د شمالي کارولینا وضعیت ته وګورئ، څومره بې غوري ورسره وشوه.

او نورو ایالتونو ته وګورئ چې اوس له هغو توپانونو کړیږې چې څو میاشتې مخکې شوې وو. او دغه اوس لاس انجلس ته وګورئ، چې هغه اورونه اوس هم بلیږي چې څو اونۍ مخکې بل شوې وو او د مخنیوي هیڅ تدبیر یې نشته، او همداسې کورونه او ښارګوټي سوځي، اوداسې سیمې سوځي چې د امریکا په سطحه بډایه خلک پکې اوسیږي. همدا اوس یې څو تنه دلته ناست دي. کورونه نلري، جالبه نده؟ خو دغه حالت نور نشو زغملی. هر څوک خو هر څه نشي کولی.

موږ یوه داسې د روغتیا وزارت لرو چې د اضطراري حالاتو کې د خلکو روغتیايي اړتیاوې نشي پوره کولی، خو په نړۍ کې د بل هر هېواد د روغتیا تر وزارت ډیرې پیسې مصرفوي. زموږ د ښوونې او روزنې وزارت نصاب ماشومانو ته داسې سبق ورکوي چې په خپل هویت شرمیږي. حتی په خپل هېواد شرمیږي. سر له نن څخه به دا وضعیت بدلوو. ډیر ژر به یې بدلوو.

زما انتخاب کیدل یو هدف لري چې په بشپړ ډول وحشتناک خیانت پای ته ورسوم او د خلکو عقیده، شتمني، دیموکراسي او په حقیقت کې ازادي بیرته پرځای کړم. د امریکا مخ په ځوړ تلل ختم شول او زموږ ازادي او زموږ د ملت تقدیر به له دې وروسته نه بدلیږي. موږ به سملاسي د امریکا د حکومت وقار، وړتیا او صداقت په ځای کړو.

په تیرو اتو کلونو کې د امریکا په ۲۵۰ کلن تاریخ کې زه د بل هر ولسمشر په پرتله ډیر آزمایل شوی یم او له ننګونو سره مخ شوی یم، ما په دې موده کې ډیر څه زده کړل. زه تاسې ته ویلی شم چې زموږ د جمهوریت بیا احیا کیدل یوه اسانه چاره نه وه. هغو کسانو چې هیله لرله زموږ د ارادې مخه ونیسي، هڅه یې وکړه چې زما ازادي سلب کړي او په حقیقت کې څو میاشتې مخکې په ښلکې پنسلوانیا کې یې زما د وژلو هڅه وکړه. د بریدګر مرمۍ زما په غوږ ولګیده خو ما احساس وکړ او په دې باور شوم چې زما ژوند د یو هدف لپاره وژغورل شو. زه خدای وساتلم چې امریکا بیرته باعظمته کړم.

ځکه نو د امریکا د هیوادپالو په حکومت کې به موږ هڅه وکړو چې هر کړکیچ په وقار، قوت او وړتیا سره حل کړو. موږ په هدف او سرعت سره د خپلو اتباعو چې د هر دین او مذهب، توکم او باور پورې اړه لري د هوساینې، خوندیتوب او سولې لپاره پر مخ ولاړ شو. د ۲۰۲۵ کال د جنوري شلمه د امریکایي اتباعو لپاره د ازادۍ ورځ ده.

دا زما هیله ده چې زموږ وروستۍ ټاکنې د هیواد په تاریخ کې تر ټولو د مهمو ټاکنو په توګه په یاد پاتې شي. لکه څنګه چې زموږ بریا وښوده، ټول ملت زموږ د اجندا ملاتړ وکړ، په انلاین شکل د ملاتړ څخه نیولې، ځوانانو ډیر عمره کسانو، نارینه وو، میرمنو، افریقایي امریکایانو، هسپانوي امریکایانو، آسیایي امریکایانو، کلیوالو، ښاري خلکو، د لرو پرتو سیمو، تر ټولو مهمه موږ په ټولو اوو رقابتي ایالتونو کې لویه بریا درلوده او عمومي رایې مو د میلیونونو په توپیر وګټلې. غواړم د تور پوستو او هسپانوی نژادو ټولنو څخه مننه وکړم چې په مینه او پراخ اخلاص سره یې ماته رایه راکړه، موږ په دې برخه کې ریکارد جوړ کړ او دا مو نه هیریږي. په کمپاینونو کې مې ستاسې غږ واورید او په راتلونکو کلونو کې ستاسې سره کار کولو ته په تمه یم.

نن د مارټین لوټر کینګ ورځ ده د هغه په درناوی، دا به د ستر ویاړ ورځ وي. د هغه په ویاړ به موږ هڅه وکړو چې په ګډه د هغه خوب په ریښتیا بدل کړو.

ملي وحدت بیرته امریکا ته ستنیږي او په هر هغه کار کې چې موږ یې سرته رسوو، اعتماد او ویاړ له ورایه ښکاري. زما حکومت به د استعداد او دایمي موفقیت سره پر مخ ځي. موږ به خپل هیواد هیر نکړو، موږ به خپل اساسي قانون هیر نکړو او موږ به خدای هیر نکړو.

زه به نن یو لړ تاریخي اجرائیوي فرمانونه لاسلیک کړم او په دې سره به په بشپړه توګه د امریکا بیرته احیا کیدل او د منطق انقلاب پیل شي. دا ټوله د منطق خبره ده. لومړی به زمونږ په جنوبي سرحد کې ملي اضطراري حالت اعلان کړم. ټول غیر قانوني راتګ به په سمدستي توګه بند شي او د میلونونو جنایي اجنبیانو بیرته لیږلو بهیر به هغو ځایونو ته پیل کړو له کوم ځای څخه چې راغلي دي. مونږ به په مکسیکو کې د پاتې کیدو پالیسي بیرته ژوندۍ کړو. زه به د نیولو او خوشې کولو اقدام له منځه یوسم او زه به جنوبي سرحد ته سرتیري واستوم چې زمونږ په هیواد د تباه کوونکي یرغل مخه ونیسي.

کوم اجرائیوي فرمانونه چې زه یې لاسلیک کوم، مونږ به جنايي‌ ډلې د بهرنیو ترهګرو سازمانونو په لست کې شامل کړو. او د ۱۷۹۸ کال د دښمنانو قانون په عملي کیدو سره ، زه به حکومت ته امر وکړم چې د ټولو بهرنیو جنایي ډلو او جنایي شبکو له منځه وړلو لپاره د بشپړو فدرالي او ایالاتي قانوني حاکمیت څخه کار واخلي چې زمونږ په خاورې، ښارونو او مرکزونو کې ورانوونکی جنایت کوي.

د سر اعلی قوماندان په توګه، زما تر ټولو ستر مسؤلیت د بهرنیو ګواښونو او یرغلونو په مقابل کې زمونږ د هیواد دفاع ده او دا هغه څه دي چې زه به یې په دقیقه توګه اجرا کړم. مونږ به یې پداسې توګه وکړو چې لا یې چا مثال ندی لیدلی.

بله دا چې زه به د کابینې ټولو غړیو ته امر وکړم چې د بې ساري انفلاسیون ماتې ورکولو او د نرخونو او لګښتونو ټیټوالي لپاره د ټولو امکاناتو څخه کار واخلي. د انفلاسیون علت تر اندازې لوړ لګښتونه او د انرژۍ بیو لوړوالی دی او له همدې کبله به زه د انرژۍ ملي بیړنی حالت اعلان کړم او مونږ به وړې برمې ووهو.

امریکا به یو ځل بیا تولیدونکی هیواد شي او مونږ داسې څه لرو چې هیڅ تولیدونکی هیواد یې نلري او هغه په نړۍ کې تر ټولو ډیر د تیلو او ګازو زخیرې دي او مونږ به ترې کار واخلو. اجازه راکړئ چې ترې کار واخلو. مونږ به نرخونه راښکته کړو او خپلې ستراتيژیکې ذخیرې به تر خولې ډکې کړو او د امریکا انرژۍ به ټولې نړۍ ته صادره کړو.

مونږ به بیا یو غني هیواد شو او پدې کار به زمونږ سره هغه مایع سره زر مرسته وکړي چې زمونږ تر پښو لاندې دي. کوم اقدامات چې زه یې کوم، مونږ نوی زرغون تړون پای ته ورسوو او د برقي موټرو قانون به لغوه کړو، د خپلو موټرو صنعت به خوندي کړو او د امریکایي موټر جوړوونکو سره خپله سپیڅلې ژمنه وساتم. که په بله طریقه یې ووایم، تاسو به وکړی شئ چې د خپلې خوښې موټر واخلئ. مونږ به بیا په امریکا کې د موټرو تولید پداسې نرخونو پیل کړو چې څو کاله وړاندې یې چا تصور هم نشوی کولی. او زمونږ د هیواد موټر جوړوونکو څخه مننه چې ما ته مو د باور رایه راکړې وه. مونږ په دې رایو غوره کارونه وکړل.

زه به په سمدستي توګه زمونږ د سوداګریز نظام بدلول پیل کړم چې امریکایي کار کوونکي او کورنۍ وژغورم. د نورو هیوادونو غني کولو لپاره پخپلو اتباعو د مالیې لګولو پر ځای مونږ به په بهرنیو هیوادونو ګمرکې تعرفې او مالیه وضع کړو چې خپل اتباع غني کړو.

مونږ به د ګمرکي تعرفو، محصول او عایداتو راټولولو لپاره، د بهرنۍ عاید خدمت اداره تاسیس کړو. دا به زښته ډیرې پیسې وي چې د بهرنیو سرچینو څخه زمونږ خزانې ته راځي. امریکایي هیلې بیرته په بې ساري توګه ژوندۍ کیږي تر څو په فدرالي حکومت کې بشپړ اغیزمنتوب او اهلیت پیدا شي. او زما اداره به د حکومت اغیزمنتوب په نامه نوی ریاست تاسیس کړي.

د بیان آزادۍ لپاره د کالونو راهیسې د غیر قانوني او د اساسي قانون خلاف فدرالي هڅو څخه وروسته، زه به د حکومت ټول سانسور له منځه وړلو او په امریکا کې د بیان آزادۍ بیرته راوړلو لپاره یو اجرائیوي فرمان صادر کړم.

د سیاسي مخالفینو د ځورولو لپاره به هیڅکله د دولتي واک څخه د حربې په توګه کار وانخیستل شي، هغه څه دي چې پرې یو څه پوهیږم. دا به زما تر مشرۍ لاندې بیا پیښ نشي. مونږ به د اساسي قانون حاکمیت لاندې عادلانه، برابر او بې طرفه عدالت احیا کړو. او مونږ به خپلو ښارونو ته بیرته قانون او نظم راولو.

دا اونۍ، زه د حکومت هغه تګلاره هم پای ته رسوم چې د عامه او شخصي ژوندانه په بیلا بیلو برخو کې د توکم او جنسیت د ناوړه بدلولو هڅه کوي. موږ به داسې یوه ټولنه جوړوو چې د پوستکې رنګ پکې مهم نه وي او د استعدادونو پر اساس ولاړه وي. له نن څخه وروسته، دا د متحده ایالاتو د حکومت رسمي تګلاره ده چې یوازې دوه جنسونه –نارینه او ښځینه– شته.

دا اونۍ به زه د پوځ ټول هغه غړي بیرته په کار وګومارم چې پر ځان د کرونا د واکسین د تطبیق کولو د غوښتنې د رد کولو له کبله له پوځ څخه ایستل شوي. زه به دا فرمان هم لاسلیک کړم چې زموږ سرتیري د راډیکالو سیاسي تیوریو او ټولنیزو تجربو هدف ونه ګرځول شي. دا کار به سمدستي پای ته رسیږي. زموږ وسله وال ځواکونه به یوازې خپل ماموریت ته پام کوي چې د امریکا د دښمنانو ځپل دي.

د ۲۰۱۷ په څېر به موږ یوځل بیا د نړۍ ترټولو ځواکمن داسې پوځ تیار کړو چې نړۍ یې ساری نه وي لیدلی، چې د سولې ټینګونکی او د یووالي رامنځته کوونکی وي. زه خوښ یم چې اعلان وکړم چې زما د لوړې له مراسمو یوه ورځ وړاندې، په منځني ختیځ کې یرغمل شوي خپلو کورونو او کورنیو ته د ستنېدو په حال کې دي.

امریکا به د ځمکې پر مخ د ترټولو ستر، ځواکمن او د درناوي وړ ملت په توګه، خپل هغه ځای دوباره ومومي چې ټوله نړۍ یې قدر کوي. له اوس څخه لږ شیبه وروسته به زه د مکسیکو د خلیج نوم د امریکا په خلیج بدل کړم. او د ډینالي د څوکې نوم به په ماونټ مکینلي واړوم، دا ځکه ښايي چې ولسمشر مکینلي د تعارفو او استعدادونو له لارې زمونږ هېواد ډیر غني کړ. هغه یو طبیعي سوداګر و.

د [پخواني ولسمشر] ټیډي روزویلټ د ډیرو لاسته راوړنو څخه یو هم د پاناما کانال و، کوم چې په ناسنجیده توګه پاناما ته ورکړل شو. په دې اړه فکر وکړئ چې امریکا یې په جوړولو څومره پیسې ولګولې او ددغه کانال د جوړولو په جریان کې څومره وګړي مړه شول. دا زموږ سره یوه ناانصافي ده او دا کانال باید په سوغات کې نه وای ورکړل شوی. د پاناما کانال په اړه زموږ سره شوې ژمنې ماتې شوي دي. ددې کانال تړون او شوې ژمنې تر پښو لاندې شوې دي. له امریکايي بیړیو څخه له اندازې زیات فیسونه اخیستل کیږي او په هیڅ ډول عادلانه چلند ورسره نه کیږي چې په دې کې د امریکا د سمندري ځواکونو بیړۍ هم شاملې ده. له دې برسېره، چین د پاناما کانال چلوي. دا کانال موږ چین ته نه بلکې پاناما ته ورکړی، او موږ یې اوس بیرته ترلاسه کوو.

له هرڅه وړاندې، د امریکا خلکو ته زما پیغام نن دا دی چې د تاریخ د پیاوړو مدنیتونو په څېر د خپل ملت د ازادۍ لپاره یو ځل بیا په میړانې ودریږي. موږ به دا هېواد د بریاوو تر نورو لوړو پوړونو ورسوو. موږ به وېره نه کوو. په ګډه به د مزمنو ناروغیو مخه نیسو او خپل ماشومان به صحتمند او له ناروغیو خوندي ساتو. امریکا به یو ځل بیا ځان پراخېدونکی هېواد وګڼي، داسې یو هېواد چې شتمني مو زیاتیږي، ځمکه مو پراخیږي، زموږ ښارونه جوړیږي، او زموږ بیرغ زموږ له تمې هم زیات تر نورو لوړو ارتفاعاتو ورسیږي. موږ به د ستورو پر لور د رسېدو لپاره خپلو هڅو ته دوام ورکوو او هڅه کوو چې یوه ورځ زموږ ستورمزلي زموږ د ستورو او لیکو بیرغ د مریخ پر مخ ورپوي.

هیله، د یو ستر ملت د ژوند وینه ده او زموږ ملت اوس تر بل هر وخت ډېر هیله مند دی. زموږ د ملت په څېر ملت نشته. امریکایان کاشفان دي، معماران دي، نوښتګر دي، متشبثین دي او مبتکر دي. د لومړي والي روحیه زموږ په زړونو کې لیکل شوې ده. د اینده لویې ماجرا غږ زموږ له روح څخه پورته کېږي. زموږ نیکونو (اسلافو) د لویې وچې په یوې څنډې کې له څو کوچنیو مستعمرو څخه د ځمکې په سر یو عالي جمهوریت او تر ټولو فوق العاده وګړي جوړ کړل. هېڅوک موږ ته نژدې نه راځي. امریکایان د یو نا تسخیر شوي بیابان زرګونه میله کلکه ځمکه ګز او ګام کوي.

هغوی له صحراو تېرېږي، په غرونو اوړي، په ناویل شویو خطرونو باندې لاسبري کېږي، د مریتوب په ختمولو سره د امریکا سرحدونه خپلوي، میلیونونه خلک له ظلم څخه ژغوري، میلیاردونه خلک له فقر څخه ژغوري، په اتوم باندې یې مهاروي او بشر په خوځښت راولي. اسمانونو ته خيژي او د بشري علم نړۍ د انسان په ورغوي کې ږدي.

که ګډ کار وکړو، داسې کوم څه به نه وي چې ویې نه شو کړای او داسې کومه هیله به نه وي، چې پوره یې نه شو کړای. ډېر خلک فکر کوي چې زما لپاره ناممکنه وه چې بیا داسې سیاسي راستنېدل وکړم. خو تاسو یې نن ګورئ، زه دلته ولاړ یم او د امریکا خلکو خپله اراده وښودله.

زه ستاسو په مخکې د یو ثبوت په توګه ولاړ یم چې باید هېڅکله هم داسې فکر ونه کړئ چې په امریکا کې به کوم څه نا ممکن وي. نا ممکن هغه څه دي چې موږ یې تر ټولو ښه کوو.

وطنپالو نسلونو له نیویارک څخه نیولې تر لاس انجلس پورې، له فلادیلفیا څخه نیولې تر فینکس پورې، له شیکاګو څخه نیولې تر هیوسټن پورې او تر دې و اشنګټن ډي سي پورې، زموږ هېواد رغولی او جوړ کړی دی او زموږ د حقونو او ازادۍ لپاره یې هر څه نذرانه کړي. دوی کروندګر وو، سرتېري وو، شپانه وو، د فابریکې کارکوونکي وو، د فولادو د فابریکو کارکوونکي او د سکرو ډبرو کان کېندونکي وو، پولیس افسران او خلاق خلک وو، چې مخ په وړاندې تلل او هېڅ یو خنډ یې په مخکې نه پرېښوده چې د هغوی روحیه او یا ویاړ وځپي. دوی په ګډه بنسټونه کېښودل، د اورګاډي پټلۍ يې جوړې کړې، پورته شول، اسمانڅکي ودانۍ یې جوړې کړې، لویې لارې یې ورغولې، دوې نړیوالې جګړې یې وګټلې، فاشیزم او کمیونیزم یې مات کړل او له هرې ستونزې سره چې مخامخ شول، پرې برلاسي شول.

له دې ټولو سره سره، موږ ټول په ګډه تر دې ځایه رسېدلي یو. موږ د امریکا د تاریخ د څلورو سترو کلونو په درشل کې یو. ستاسو په مرستې به د امریکا ژمنې په ځای کړو او ملت، چې موږ ورسره زیاته مینه لرو، بیا ورغوو.

موږ د خدای تر سیوري لاندې خلک یو، یوه کورنۍ او یو ویاړلی ملت یو. زه، د ټولو هغو میندو او پلرونو سره چې د خپلو اولادونو لپاره هیلې لري او د هغو ماشومانو سره، چې د خپلې ایندې لپاره هیلې لري، ولاړ یم. زه به ستاسو لپاره مبارزه وکړم او ستاسو لپاره به بری راوړم. موږ به یې داسې ګټو چې مخکې یې ساری لیدلی شوی نه وي.

له تاسو مننه. په وروستیو کلونو کې زموږ ملت ډېر وکړېده، مګر موږ به یې بیرته خپل حالت ته راوګرځوو او بیا به یې ستر کړو داسې ستر چې مخکې یې مثال نه وي، د نورو څخه متفاوت ملت واوسی، له مهربانۍ ډک، زړور او جلا، زموږ ځواک به ټولې جګړې ودروي او خشمېدلې، تاوتریخجنې او په بشپړ ډول نه منونکې نړۍ ته د اتحاد یوه نوې روحیه انتقال کړي.

یو ځل بیا به د امریکا درناوی وشي او وبه ستایل شي، مذهبي، دیني او ښه نیت لرونکي افراد به یې هم [درناوی او ستاینه] کوي. موږ به سوکاله یو، ویاړلي به یو، موږ به غښتلي یو او موږ به یې داسې ګټو، چې مخکې یې مثال نه وي. موږ به نه مغلوب کېږو، موږ به نه ډارېږو، موږ به نه ماتېږو او موږ به نه ناکامېږو.

له نن څخه وروسته به متحده ایالتونه یو ازاد، مستقل او خپلواک ملت وي. موږ په مېړانې سره درېږو. موږ به په ویاړ ژوند کوو. موږ به سترې هیلې لرو او هېڅ شی به هم زموږ په وړاندې خنډ نه شي، ځکه چې موږ امریکایان یو، راتلونکی زموږ دی او زموږ طلايي دوره اوس پیل شوه. له تاسو مننه. خدای دې په امریکا رحم وکړي. له تاسو ټولو ډېره مننه