د ملګرو ملتونو ښوونیز، علمي او فرهنګي سازمان "یونسکو" ویلي دي چې په افغانستان کې به فرهنګي میراثونو ته هر ډول زیان، په هغه هیواد کې تل پاتې سولې او د بشري مرستو څرنګوالي ته زیان رسول وي.
یونسکو د پنجشبې په ورځ اګست ۱۹ (زمري ۲۸) د یوې اعلامیې په خپرولو سره د فرهنګي میراثونو د مسلکي کارکوونکو او هنرمندانو د کار لپاره د خوندي چاپیریال د رامنځ ته کیدو په ضرورت ټینګار وکړ او ویې ویل چې هغوی "د افغانستان د ملي یووالي او ټولنیز جوړښت لپاره مرکزي رول لوبوي."
ددې اعلامیې په حواله د افغانستان پراخ فرهنګي میراثونه چې ددغه هیواد له تاریخ او هویت سره نه بیلیدونکی تړاو لري او په ټوله کې بشریت ته ارزښت لري، باید وساتل.
د کابل موزیم، د هرات زوړ ښار، د جام منار او د بامیانو تاریخي آثار د افغانستان تاریخي شتمنۍ دي چې یونسکو هغوی ته اشاره کړېده.
طالبانو په ۱۹۹۰ لسیزه کې د بامیان ولایت تر نیولو وروسته، د بودا مشهورې مجسمې "شهمامه او صلصال" له منځه یوړې.
د یونسکو سازمان رئیس آدري ازولي د نړیوالو قوانینو پر اساس د افغانستان د بیلایبلو فرهنګي شتمنیو د ساتنی غوښتنې کړې او هغوی ته یې د زیان رسیدو او لوټ کیدو د مخنیوي په هدف د اړینو اقداماتو غوښتنه کړېده.
