د امریکا د خوراک او دارو درملو د ادارې یو ځانګړي هیات د پنجشنبې په ورځ د کرونا ضد واکسین چې امریکایي شرکت فایزر او د جرمني شرکت بایونټیک په ګډه جوړ کړی، منظور کړ.
دغه اداره ښایي نن جمعه، ډسمبر ۱۱ (لیندۍ۲۱) یا سبا د شنبې په ورځ په بیړنیو حالاتو کې ددې واکسین د استعمال اجازه ورکړي.
که دا کار وشي، متحده ایالات به د برتانیې نه وروسته دویم غربي هیواد وي چې د فایزر او بایونټیک د شرکتونو لخوا د کرونا ضد جوړ شوي واکسین ته اجازه ورکوي.
د امریکا منتخب جمهور رئیس جو بایډن د ایف ډي اې د متخصصینو پریکړه " په تیاره کې رڼا" بللې.
د امریکا په متحدو ایالاتو کې د کرونا ضد واکسین د تطبیق موضوع پداسې حال کې توده ده چې دې ویروس په نړۍ کې د ټولو نه زیاته امریکا ځپلې ده.
کروناویروس یوازې په تیرو ۴۸ ساعتونو کې په امریکا کې نږدې ۶ زره کسان مړه کړي چې پدې سره په امریکا کې د دې وبا له وجې د ټولو مړو شویو کسانو شمیر ۳ سوه زرو ته نږدې شوی.
په آزمایښتي استعمال کې د فایزر او بایونټیک د شرکتونو واکسین ۹۵ په سلو کې اغیزمنتوب درلود خو لا هم د امریکا ولس د دې واکسین د خوندیتوب په هکله اندیښمن دي.
د امریکا تر څنګ په نورې نړۍ کې هم د واکسین په پلانونو چټک کارونه روان دي.
برتانیې تیره اونۍ لومړنی لویدیځ هیواد شو چې د واکسین کول یې منظور کړل او سعودي عربستان، کاناډا او بحرین هم منظوري ورکړې خو تطبیق یې لا ندی پیل شوی.
چین او روسیې بیا په کور دننه د واکسین کولو هڅې پیل کړي او اروپایي هیوادونو لا هم اجازې ورکولو ته سترګې په لار دي.
د اروپایي هیوادونو د څار ادارې ویلي چې د فایزر او مودرینا شرکتونو لخوا د جوړو شویو واکسینونو په هکله به د همدې روانې ډسمبر د میاشتې په وروستو شپو ورځو او یا هم د بل کال د جنوري د میاشتې په سر کې پریکړه وکړي.
کرونا ویروس د لومړي ځل لپاره تیر کال د ډسمبر په میاشت کې په چین کې پیدا شو خو د روغتیا نړیوال سازمان وایي چې اوس د نړۍ ۱۹۶ هیوادونو ته خپور شوی.
