د طالبانو د حکومت د عامې روغتیا وزارت وايي چې د افغانستان په ۱۶ ولایتونو کې نن د دوشنبې په ورځ فبرورۍ ۲۴ (کب شپږمه) د پولیو یا د ماشومانو د ګوزڼ ضد واکسین څلور ورځینی کمپاین پیل شوی دی.
ددغه وزارت ویاند ډاکټر شرافت زمان امرخیل رسنیو ته په استولي ویډيوي پیغام کې ویلي چې چې په دې کمپاین کې به د پنځه کلنو څخه د کم عمر ۶.۳ میلیونو ماشومانو ته د پولیو واکسین څاڅکي ورکړل شي.
شرافت زمان امرخیل د دیني عالمانو او قومي مشرانو غوښتي چې د کمپاین د ښه تطبیق په برخه کې دې د روغتیايي ټیمونو سره مرسته وکړي.
هغه ویلي: " د قومي مخورو ، دینې عالمانو اود سیمې له اوسیدونکو څخه مو هیله ده چې زمونږ د واکسیناتورانو سره مرستندویه اوسي، ترڅو وکولای شو چې د واکسین په ښه تطبیق سره په افغانستان کې د پولیو د وحشي ویروس څخه مخنیوی وکړو."
د طالبانو د عامې روغتیا وزارت د معلوماتو پر بنسټ، دا کمپاین چې په افغانستان کې د پولیو ناروغۍ د مخنیوي لپاره ترسره کېږي تر ډیره په به هغو ولایتونو کې چې د پاکستان سرحد سره نږدې پراته دي ترسره شي.
افغانستان کې د پولیو یا د ماشومانو د ګوزڼ پر ضد د واکسین دا فرعي کمپاین په داسې کال کې پیل شوی چې د بادغیس په ولایت کې د طالبانو عامې روغتیا ریاست سیمه ییزو چارواکو ددغه ولایت د بالامرغاب په ولسوالۍ کې د روان ۲۰۲۵ کال پولیو ویروس د یوې مثبتې پیښې د ثبت خبر ورکړی دی.
د سیمه ییزو رسنیو د راپور له مخې ددې پیښې راپور د فبرورۍ د میاشتې ۲۱( کب درېیمه) ورکړل شوی وو او ویل شوي وو چې د بادغیس ولایت د بالامرغاب ولسوالۍ د "قرتو" په کلي کې یوه پنځه کلنه نجلې د پولیو د ویروس پر ناروغۍ اخته شوې ده.
دا په افغانستان کې په ۲۰۲۵ کال کې لومړنۍ مثبته پیښه ده چې ثبت شوې ده.
خو د طالبانو د حکومت د عامې روغتیا وزارت تراوسه په رسمي ډول دا پیښه نه ده تائید کړې.
افغانستان کې پولیو پیښو زیاتیدل
د ریلیف انټرنیټي پاڼې د ملګرو ملتونو د راپورونو پر اساس ویلي چې په افغانستان کې د طالبانو حکومت په ۲۰۲۴ کال کې د پولیو یا د ماشومانو د ګوزڼ ضد واکسین دوه ځلې ځنډولو وروسته د دغه کال د اکتوبر په میاشت کې د واکسین د تطبیق اجازه ورکړه، خو د کور په کور د واکسین د تطبیق پرځای یې ماشومانو ته په جوماتونو او د کلیو په مرکزونو کې د واکسین د ورکولو پریکړه وکړه.
په دې راپور کې ویل شوي: " له دې وروسته به واکسیناتوران کور په کور د واکسین د تطبیق وړتیا ونلري. داسې ښکاري چې دغه ځنډ او د واکسین د تطبیق په بڼه کې بدلون ممکن په افغانستان کې د پولیو د مثبتو پیښو د زیاتیدو سبب شوی وي".
د روغتیا د نړیوال سازمان د راپور له مخې په ۲۰۲۴ کال کې په افغانستان کې د پولیو ۲۵ مثبتې پیښې ثبت شوي، چې په تیرو څلورو کلنو کې تر ټولو لوړ شمیر دي. په دې راپور کې ویل شوي چې د طالبانو د حکومت د عامې روغتیا وزارت دا شمیر نه مني او ادعا کوي " په هیواد کې د پولیو هیڅ پیښه نه ده ثبت شوې."
افغانستان او پاکستان هغه دوه هیوادونه دي، چې لا هم د ماشومانو ګوزڼ یا پولیو ویروس په دغو هیوادونو کې د ماشومانو ژوند د ګواښ سره مخ کوي.