د امریکايي ډالرو په وړاندې د افغانیو د ارزښت له کمېدلو وروسته د افغانستان په پایتخت کابل کې خلک د خوراکي توکو د بیو له لوړېدو شکایت کوي.
د دوشنبې په ورځ جنوري ۲۷ (سلواغې اتمه) یو ډالر ۸۰ افغانۍ شو. په وروستیو څو اونیو کې یو ډالر په ۷۰ افغانۍ تبادله کېده.
د کابل ښار اوسېدونکي وايي د خوړو او د ژوند د اساسي ضرورتونو د نورو توکو بیې لوړې شوي دي. دوی اندېښنه لري چې دا قیمتونه ښايي بیا راښکته نه شي.
کتونکي په دې باور دي چې د افغانیو په ارزښت کې بدلون د امریکا د بهرنیو مرستو د بندولو په اړه د ټرمپ له پرېکړې سره تړاو لري. د امریکا متحده ایالات د افغانستان لپاره تر ټولو زیاته مرسته چمتو کوي.
شنونکو وویل، د افغانستان د اسعارو ثبات په یوه برخه کې د هغو امریکايي ډالرو پورې اړه لري چې مرستندویه موسسو ته ځي چې بیا په بازار کې د افغانیو په بدل کې تبادله کیږي.
شنونکی طارق فرهادي چې په ۲۰۰۱ کال کې افغانستان کې د طالبانو د لومړۍ واکمنۍ له پای ته رسېدو وروسته د افغانیو د ثبات په برخه کې سلاکار و، وویل، وېره دا ده چې "دا ډالر نور نه راځي. نو افغانۍ اخیستونکي نه لري."
کابل کې د خوراکي توکو د بیو لوړېدل.
په کابل کې ۴۰ کلن دوکاندار عبدالمعروف نیاز زاده وايي، دا بدلون "شاید د نورې نړۍ لپاره هیڅ معنی ونه لري، خو دا په افغانستان کې لوی اغیز لري."
هغه وويل: "په بيو کې بدلون ښايي د سوداګرو لپاره د پام وړ نه وي، خو د بې وزلو لپاره دا ډېره سخته ده." هغه يادونه وکړه چې د ورځنيو توکو لکه اوړو، غوړيو او وريجو په بيو کې له ۲۰۰ څخه تر ۵۰۰ افغانۍ زیاتوالی راغلی دی.
د خوړو نړیوال پروګرام د جنوري په میاشت کې وویل چې په افغانستان کې نږدې ۱۵ میلیون خلک له لوږې سره مخامخ دي، چې د ملګرو ملتونو ددغې ادارې لخوا په روان سخت ژمې کې ورسره د مرستې هڅه کیږي.
په کابل کې ۲۸ کلن صراف طوفان احمدي فرانس پرس ته وویل: "خوراکي توکي، تېل، ګاز، هر څه قیمت کیږي."
نړیوال بانک د ۲۰۲۴ کال د دسمبر میاشتې په یو راپور کې وویل چې د افغانیو ثبات "په لویه کچه د افغانستان په وړتیا پورې اړه لري چې هېواد ته د بهرنیو اسعارو دوامدار جریان خوندي کړي د تادیانو له لارې او یا هم د خپلو صادراتو د پراخولو له لارې."
په راپور کې ټینګار شوی چې د افغانستان د بهرنیو اسعارو زیرمې دومره ندي چې دغه هېواد له بهرنیو اقتصادي اغیزو څخه وژغوري.
د افغانستان مرکزي بانک د دوشنبې په ورځ د ۲۵ میلیون ډالرو د لیلام اعلان وکړ او افغانانو ته یې ویلي چې د اسعارو په ارزښت کې د بدلون په اړه "اندېښنه مه کوئ" خو زیات شمېر افغانان د خپلو افغانیو د بدلولو لپاره بانکونو ته تللي دي.
ددې مطلب لپاره د فرانس پرس له معلوماتو استفاده شوې ده.