د سولې په اړه د مشورتي لویې جرګې د ۵۰ کمېټو رئیسان د یادې جرګې په دوهمه ورځ نن شنبه د خپلو بحثونو پایلې په علني ډول د جرګې له نورو غړو سره شریکوي.
پرون جمعه د سولې د مشورتې جرګې تر پرانیستلو وروسته د جرګې ګډونوالو په ګروپي ډول د ځینو مشخصو پوښتونو په اړه د نظر په ورکولو سره کارونه پیل کړل.
د ۴۰۰ طالب بندیانو د برخلیک معلومېدو په اړه تر دا مهاله د څه باندې ۴۰ کمېټو رئیسانو خپل راپورونه په علني ډول د جرګې له نورو غړو سره شریک کړي دي.
د یادې جرګې غړو په ۵۰ کمېټو کې پرون تر ماسپښين وروسته پر ورسپارل شوو سوالونو کار پيل کړی و او هرې کمېټې د خپلو بحثونو پایلې په یو لنډ راپور کې د مشورتي لویې جرګې په دوهمه ورځ له نورو ګډونوالوسره شریکوي.
د یادې جرګې یوې غړې اندېشه مشعل د شنبې په ورځ اګست ۸مه(زمري۱۸) امریکا غږ ته وویل چې په لومړۍ ورځ د جرګې ټولو غړو په کمېټو کې"طالبان ازاد شي چې مذاکرات پيل شي؟ او که ازاد نه کړل شي تاوتریخوالی زیاتیږي." خپل نظرونه شریک کړل.
اغلې مشعل زیاته کړه:"د کمېټې زیات غړي د طالبانو د ازادولو طرفدار دي، خو په دې شرط چې طالبان لومړی اوربند وکړي او مخامخ خبرو ته حاضر شي."
د جرګې د کړنلارې په اساس د هرې کمېټې رئیس پنځه دقیقې وخت لري چې د یادې موضوع اړوند خپل نظریات د سولې مشورتي لویې جرګې له غړو سره شریک کړي.
د مشورتي لویې جرګې رئیس عبدالله عبدالله نن شنبه اګست ۸مه(زمري۱۸مه) پر خپل ټویټر پاڼه لیکلي چې د ۵۰ کمېټو له ډلې ۳۳ کاري کمېټو یې خپل راپورونه وړاندې کړي دي.
هغه ویلي چې پاتې ۱۷کمېټې به د نن شنبې په اوږدو کې خپل راپورونه وړاندې کړي.
د سولې مشورتي لویې جرګې رئیس عبدالله عبدالله وايي، د ۴۰۰ طالب بندیانو د خوشي کولو او نورو اړوند مسائلو په اړه د کمېټو پرېکړه به نن اعلان شي.
ښاغلي عبدالله همدارنګه ویلي د افغانستان خلک او نړیواله ټولنه یو مثبت او رغنده پرېکړې ته سترګې په لار دي.
We began the second working day of the Consultative Peace Jirga (CPJ). Yesterday, 33 out of 50 CPJ working committees submitted their suggestions, which continued late into the evening. Today, the remaining 17 committees will submit their suggestion. 1/2 pic.twitter.com/ZBZgWF7Q4P
— Dr. Abdullah Abdullah (@DrabdullahCE) August 8, 2020
د سولې په اړه مشورتي لویه جرګه پرون جمعه د اګست۷(زمري۱۷مه) په کابل کې د ولسمشر غني لخوا پرانیستل شوه.
په دغه جرګه کې د ښځو او بهرنیو مېلمنو په ګډون ۳۲۰۰ تنو ګډون کړی دی چې درې ورځې به دوام ولري.
ولسمشر غني تیره ورځ د جرګې پرانیستلو وینا کې د طالب بندیانو د برخلیک په اړه د جرګې د ګډونوالو پرېکړه مهمه وبلل:"ستاسو د نن او سبا ورځې تصمیم ډېر مهم دی. زه خپله تاسې ته هیڅ ډول فرمایش نه لرم، ځکه زه ستاسو هر یو په درایت او وطن دوستۍ باور لرم."
د امریکا متحده ایالاتو، ناټو او اروپايي ټولنې د مشورتي لویې جرګې د تر سره کېدو هر کلی کړی دی.
تیره ورځ د امریکا د بهرنیو چارو وزارت په یوې اعلامیې کې وویل چې د ۴۰۰ طالب بندیانو ازادول به د بین الافغاني خبرو پیلېدو سبب شي.
خو وسله والو طالبانو د یادې جرګې له رابللو سره مخالفت ښودلی او هغه یې د سولې په وړاندې خنډ بللی دی.
په کابل کې د مشورتي لویې جرګې تر سره کېدو لپاره په کابل کې سخت امنیتي تدابیر نیول شوي او د جرګې تر سره کېدو ځای ته ټولې تیري شوي لارې د تګ راتګ پر مخ تړل شوي دي.