د طالبانو د قطر دفتر د مشر ملا عبدالغني برادر په مشرۍ یو اته کسیز طالب پلاوی پر یو لړ مسایلو د بحث لپاره اندونیزیان ته روان شوی دی.
د طالبانو ویاند ذبیح الله مجاهد نن جمعه د «جولای پر۲۶مه» پر خپل ټویټر لیکلي چې یاد طالب پلاوی نن سهار له قطر څخه د اندونیزیا په لور روان شوی دی.
نوموړي ویلي:"په دغه سفر کې به د دواړو هیوادونو ترمنځ د ښو سیاسي اړيکو او د سولې او راتلونکي افغانستان لپاره د همکارۍ په اهمیت خبرې وشي."
یاد طالب پلاوی پر داسې مهال اندونیزیا ته سفر کوي، چې په تېره غوايي میاشت کې د اندونیزیا د بهرنیو چارو وزیره ریتنو لیستاري قطر ته تللې وه او د افغان سولې په اړه د شپږم پړاو خبرو پر مهال یې په دوحه کې له زلمي خلیلزاد او ملا عبدالغني برادر سره کتلي و.
نوموړې هغه مهال ویلي و هېواد یې چمتو دی د سولې په بهیر او د مېرمنو اړوند مسايلو کې له افغانستان سره مرسته وکړي.
Had a good discussion with the Special Representative of the US for Afghanistan, Amb, Zalmay Khalilzad on the Afghanistan peace process.Indonesia is committed to contribute towards Afghanistan peace process, including on woman issues pic.twitter.com/hw0cni4aSX
— Menteri Luar Negeri Republik Indonesia (@Menlu_RI) May 1, 2019
طالبانو هم هغه مهال ویلي و، چې دواړو لورو د افغان سولې پر بهیر خبرې کړي دي.
اندونیزیا تر دې مخکې د افغان سولې په اړه د افغان، پاکستاني او اندونیزیايي دیني علماو د درې اړخیزه کنفرانس ترڅنګ د څو نورو غونډو کوربتوب هم کړی دی.
دغه هېواد تل د افغان سولې په بهیر کې د همکارۍ ډاډ ورکړی دی.
اندونیزیا ته د طالب پلاوي سفر پر داسې مهال تر سره کېږي چې ټاکل شوې روانه میاشت امریکايي او طالب استازي د افغان سولې په اړه اتم پړوا خبرو ته سره کښېني.
د افغان حکومت د معلوماتو له مخې، ټاکل شوې په څو اونۍ کې «بین الافغاني» مذاکرات هم پيل شي.
تر دې مخکې پر افغان سولې د بحث لپاره چین ته هم د ملا عبدالغني برادر د سفر په اړه راپورونه ورکړل شوي، خو طالبانو په رسمي ډول نه و تائید کړي.
نوموړي تر دې مخکې د افغان سولې په اړه بین الافغاني مذاکراتو کې د ګډون لپاره روسیې ته هم تللی و.