د پاکستان په مختلفو سیمو کې مذهبي سیاسي گوندونو د پام وړ کامیابي نده ترلاسه کړې.
د پاکستان په انتخاباتو کې د ځینو هغو ترهگرو ډلو سیاسي گوندنو هم برخه اخیستې وه چې امریکا د نړیوالو ترهگرو په لسټ کې شامل کړې و. پدغو کې یو د حافظ سعید ملي مسلم لیگ سیاسي گوند و. ملي مسلم لیگ په انتخاباتو کې سخته ماتې خوړلې ده.
په پاکستان کې په وروستیو کې یو بل سیاسي گوند د تحریک لبیک گوند دی، دغه گوند د پاکستان په مختلفو سیمو کې خپل کاندیدان ودرولي و. دغه گوند هم د پارلمان لپاره یوه څوکۍ هم نده گټلې.
د متحده مجلس عمل چې د پنځو گوندونو ائتلاف دی، د جمعیت العلما اسلام، جماعت اسلامي گوندونو پکې هم شامل دي، د عمومۍ اسمبلۍ لپاره یې یواځې ۴ څوکۍ گټلې دي. د یادونی وړ ده چې متحده مجلس عمل په ٢٠٠٢ کال کې په پښتونخوا حکومت کړی و.
د جمعیت اسلام مشر مولانا فضل الرحمان پخپله د دوو حوزو نه په انتخاباتو کې برخه واخیستله او دواړه یې د عمران خان گوند ته وبایلل.
ښاغلي فضل الرحمان یوې مظبوعاتي غونډې ته په وینا کې وویل چې د انتخاباتو نتایج نه مني او دا انتخابات دې لغوه اعلان شي.
د عمران خان گوند د پاکستان په عمومي اسمبلۍ کې زیاتې څوکۍ ترلاسه کړیدي او د کارپوهانو په وینا یواځې به حکومت جوړ کړی شي.
د پاکستان تحریک انصاف گوند نه علاوه ټولو سیاسي گوندونو تور لگولی دی چې په انتخاباتو کې ټگي برگي شویده.
د یادونې وړ ده چې دا د پښتونخوا په تاریخ کې لمړنی ځل دی چې د تحریک انصاف گوند دوه وارې انتخابات وگټل.