د امریکا د بهرنیو چارو وزیر وايي چې له لسیزو جګړو وروسته د طالبانو سره د تاوتریخوالي د کمولو په اړه یو تفاهم ته رسېدلي دي.
ښاغلی پمپیو وایي چې تاوتریخوالی به په ټول افغانستان کې کمیږي. نوموړي پر ټولو افغانانو غږ وکړ چې د تاوتریخوالي د کمولو له فرصت څخه ګټه واخلي.
هغه د جمعې په ورځ (فبروري۲۱) په خپل ټویټر کې ولیکل: "دا د سولې د اوږدې لارې لپاره یوه مهم ګام دی. زه په ټولو افغانانو غږ کوم چې له دغه فرصت څخه ګټه پورته کړي."
After decades of conflict, we have come to an understanding with the Taliban on a significant reduction in violence across #Afghanistan. This is an important step on a long road to peace, and I call on all Afghans to seize this opportunity.
— Secretary Pompeo (@SecPompeo) February 21, 2020
افغان چارواکي وایي چې د تاوتریخوالي د کمولو بهیر نن شپه د کابل پر وخت ۱۲:۰۰(چې سبا یې شنبه ده- فبروري۲۲) پلیږي. افغان حکومت وايي خپلو ټولو ځواکونو ته یې ویلي دي چې د تاوتریخولي د کمولو مرحله مراعت کړي.
امریکايي چارواکي وايي د یو میکانیزم له مخې به له طالبانو سره افهام او تفهیم کوي چې د تاوتریخوالي مرحله وڅاري او په دقیق ډول پلې شي.
د افغانستان لپاره د سولې په چارو کې د امریکا ځانګړي استازي زلمي خلیلزاد په قطر کې د طالبانو له مشرانو سره له څو میاشتو خبرو اترو وروسته بلاخره د تاوتریخوالي په کمولو د دواړو خواوو ترمنځ د موافقې خبر ورکړ.
له دغې مرحلې وروسته به د افغان حکومت او طالبانو ترمنځ مذاکرات پيلیږي.
دا ټول پرمختګونه داسې مهال رامنځ ته کیږي چې اجرايي رئیس عبدالله عبدالله د ټاکنو د کمېسیون له لوري د ولسمشر غني بریالي کېدل نه مني او د موازي حکومت جوړولو اعلان یې کړی دی.