د جنوبي افریقا مخکني مشهور لوبغاړي ای بي ډیویلرز د خپل هېواد له کرکت بورډ څخه غوښتي وو چې بېرته یې ملي تیم ته ور وبولي، خو هغوی ونه مانه.
ښاغلي ډیویلرز په ۲۰۱۸ کال کې د کرکټ له نړیوالو لوبو استعفی وکړه او وویل چې د استعفی لپاره یې همدا وخت مناسب دی. هغه لا هم د آی پي ال په ګډون د نړۍ په نورو تجارتي لیګونو کې لوبیږي.
د کرکټ د نړیوال جام په ویبسایټ کې لیکل شوي دي چې تېره میاشت د جنوبي افریقا کپتان فف دوپلسي د لوبډلې د غوراوي کمېټې او بورډ چارواکو ته ویلي وو چې ښاغلي ډیولرز غواړي بېرته لوبډلې ته راشي، خو دا غوښتنه یې ونه منل شوه.
د جنوبي افریقا کرکټ بورډ ويلي دي چې د نړیوال جام لپاره یې وار د مخه لوبغاړي غوره کړي دي او باید د بورډ تګلاره او اصول ومنل شي.
ډیولرز په خپل ټویتر کې لیکلي دي چې اوس د جنوبي افریقا د کرکټ د ملي ټیم د ملاتړ او ننګې وخت دی.
All that’s important is that we should all focus on supporting the team at the World Cup. There is a long way to go and I believe the boys can still go all the way #ProteaFire
— AB de Villiers (@ABdeVilliers17) June 6, 2019
جنوبي افریقا د کرکټ د ۲۰۱۹ کال روان نړیوال جام کې خپلې درې پرلپسې لوبې وبایللې او داسې ښکاري چې ښه وضعیت کې نه ده. خو ډیولرز لیکلي دي چې باور لري لوبډله یې لا هم د وړاندې تګ وړتیا لري.
اې بي ډیولرز د جنوبي افریقا لپاره ټولې ۲۲۸ لوبې کړي او ۹۵۷۷ منډې کړي دي چې ۲۵ سلیزې او ۵۳ پنځوسیزې په کې شاملې وې.