د افغانستان لپاره د برتانیې خاص استازی وايي تیره ورځ (نومبر ۲۸) یې په دوحه کې د طالبانو د بهرنیو چارو د سرپرست وزیر امیر خان متقي په مشرۍ طالب پلاوي سره کتلي دي.
مارټن لونګډن پر خپل ټویټر پاڼه لیکلي چې له طالب پلاوي سره د افغانستان د بشري وضعیت، له افغانستان سره د برتانیې د مرستو پر دوام، د ترهګرۍ پر وړاندې مبارزې او ښوونځیو ته د ټولو افغانو نجونو د بیرته ستنېدو پر اړتیا خبرې کړي دي.
نوموړي همدارنګه زیاته کړې چې له ټولو اړخونو څخه لویه اجنډا لویو ژمنو ته اړتیا لري.
Discussed with Mawlawi Muttaqi and his colleagues today the humanitarian situation, the UK’s continued support for the Afghan people, the terrorism challenge, and the imperative of getting all Afghan girls back to school. A big agenda that needs a big commitment - from all sides. pic.twitter.com/ABj6wgbUP2
— Martin Longden (@MlongdenUK) November 28, 2021
دا په داسې حال کې ده چې د برتانیې صدر اعظم بوریس جانسن د (جي شل) هیوادونو تر غونډې وروسته له اړمنو افغانانو سره د ۵۰ میلیونه پونډه د مرستې اعلان وکړ.
نوموړي زیاته کړې وه چې له ګواښ سره مخ افغانانو په ځانګړي ډول د ښځو او نجونو سره مرسته د ټولو مسؤلیت دی.
د طالبانو د بهرنیو چارو وزارت ویاند عبدالقهار بلخي هم پر خپل ټویټر پاڼه لیکلي چې دواړو لورو په دغه لیدنه کې د افغانستان بشري، اقتصادي او امنیتي موضوعاتو په اړه خبرې وکړې.
د نوموړي د معلوماتو په اساس امیر خان متقي د برتانیې استازو په افغانستان کې د امنیت ډاډ ورکړی هغه زیاته کړې: "د ااا هيئت دوی ته د امنيت ډاډ ورکړ او ویې ويل چې د افغانستان له نړیوالو سره مثبت اړیکي غواړي او همدارنګ غوښتنه وشوه چې د روغتیا په برخه کې بايد شفافې او عاجلې مرستي وشې."
بلخي ویلي چې دواړو لورو د ورته ناستو پر دوام هوکړې کړې ده.
د یادونې وړ ده چې طالب پلاوي دوحې ته د سفر په ترڅ کې د اروپايي ټولنې له استازو سره هم کتلي دي.
اروپايي ټولنې په یوې اعلامیې کې ویلي چې له طالب استازو سره یې د ټول شموله حکومت جوړېد، د ښځو او نجونو د کار او تعلیم د حق، افغانستان دې ته نه پرېښودل چې د ترهګرۍ په مرکز بدل شي او بشري وضعیت په اړه خبرې کړي دي.
ټاکل شوې چې نن دوشبه به طالب چارواکي د امریکايي استازو سره هم خبرې پیل کړي چې دوه ورځې به ادامه ولري.