د متحده ایالاتو د خزانې وزارت په ایران باندې د فشار راوړلو د برخې په توګه د پنجشنبې په ورځ، مارچ ۱۳ (کب ۲۳)، د ایران د تیلو په وزیر محسن پاکنژاد او د بار وړونکو بیړیو په څو شرکتونو بندیزونه ولګول.
د خزانې وزیر سکاټ بیسینټ وویل: "ایراني رژیم په دوامداره توګه د ایران د تیلو له پراخو سرچینو څخه د خپلو شخصي شومو ګټو لپاره استفاده کوي او بیه یې د ایران خلک پرې کوي."
د خزانې وزارت په اعلامیه کې راغلي چې پاکنژاد "د ایران د میلیاردونو ډالرو تیلو د صادراتو نظارت کړی او په میلیاردونو ډالرو د تیلو صادرات یې د ایران وسله والو ځواکونو ته ورکړي دي."
د متحده ایالاتو د خزانې وزارت د بار وړونکو کښتیو د هغو شرکتونو په مسئولینو هم بندیزونه لګولي چې د ایران تیل یې چین ته لیږدولي او یا یې په هغه هېواد کې د ذخیرو څخه نورو ځایونو ته انتقال کړي دي.
ویل کیږي چې د ایران پوځ چین ته د میلیاردونو ډالرو تیلو په پټه لیږدولو لپاره له کرايي کښتیو څخه کار اخلي.
د خزانې وزارت وویل چې د پنجشنبې د ورځې په بندیزونو کې په هانګ کانګ کې میشتو د کښتیو د دوو شرکتونو برسېره، د ایران بیرغ لرونکې "پولاریس ۱"، په سیشل کې راجستر د "فالن شیپنګ" شرکت او په لایبریا کې راجستر د "ایټاوګوا" خدماتو شرکتونه شامل دي.
د متحده ایالاتو د بهرنیو چارو وزارت په دې اړه په یوه اعلامیه کې ویلي چې ددغو تازه بندیزونو موخه د ایران د تېلو د صادراتو د عاید مخنیوی دی ترڅو تهران د اتومي او بالستیک توغندیو د پروګرام او د خپلو نیابتۍ ډلو له ملاتړ څخه لاس واخلي.
د بهرنیو چارو وزارت ویلي متحده ایالات به د ایران د ناقانونه فعالیتونو د مخنیوي او د ایراني چارواکو لپاره د موجودو مالي سرچینو د محدود کولو په هدف هڅو ته دوام ورکړي.