ولسمشر حامد کرزي د شهیدانو د اونۍ د نمانځنې په غونډه کې وویل، چې افغانستان نوي حکومت ته عاجله اړتیا لري، او تمه لري چې نوماندان په خپلو کې جوړ شي.
ښاغلي کرزي، چې د قومندان احمدشاه مسعود د مړینې د تلین په مراسمو کې چې د لويې جرګې په تالار کې دایر شوي وو، خبرې کولې وویل، چې د ولسمشرۍ له دواړو کاندیدانو اشرف غني احمدزي او عبدالله عبدالله تمه لري، چې سبا یا بل سبا یوې نتجې ته سره ورسیږي ترڅو د لوړې مراسم ژر ترسره شي.
ښاغلي کرزي وویل "که نن یا سبا یوې نتجې ته سره ورسیږي، د وطن په ګټه دی."
ښاغلي کرزي دا خبرې په داسې حال کې کولې، چې د ولسمشرۍ دواړه نوماندان ورته مخامخ ناست ول. ولسمشر د غونډې په برخوالو غږ وکړ، چې په کاندیدانو غږ وکړي، چې یوې نتجې ته سره ورسیږي.
هغه وویل "نوی حکومت د ډاکټر عبدالله عبدالله او ډاکټر اشرف غني احمدزي په اتحاد او اتفاق جوړېدی شي، نتجې ته د دوی په رسېدلو."
ښاغلي کرزي وویل، ژر به ورته د لوړې مراسم برابر کړي، وې ویل : زمونږ توبه، په عجله کې یو، چې ژر یې درته تسلیم کړو.
حضرت صبغت الله مجددي
د ولسمشر حامد کرزي تر خبرو وروسته، عبدرب الرسول سیاف خبرې وکړې او له هغه وروسته د مجاهدینو لومړني جمهور رئيس حضرت صبغت الله مجددي ته د خبرو بلنه ورکړل شوه، خو چې کله مجددي په خبرو پيل وکړ، په غونډه کې بې نظمي خپره شوه، او د غونډې برخوالو حضرت صبغت لله مجددي خبرو کولو ته پرېنښود.
په همدې جریان کې د ولسمشرۍ کاندید عبدالله عبدالله سټیج ته پورته شو، د قوماندان احمدشاه مسعود د شهادت د ورځې د نمانځنې د غونډې له برخوالو یې وغوښتل چې د شهیدانو د ورځې درناوی وکړي، هغه د غونډې په برخوالو غږ وکړ، چې دا د شهیدانو ورځ ده او له سیاسي مسائلو سره دې نه ګډوي.
عبدالله عبدالله وویل "د شهیدانو دا ورځ له سیاسي مسائلو سره مه تړئ، سیاسي مسائل تیریږي، انشاء الله یوه د حل لار ورته پیدا کیږي، هر کال د شهید ورځ نمانځلې کیږي، د جهاد مشران چې دلته شتون لري، هېله مې دا ده چې احترام یې وکړئ، کنه خدای ناخواسته د شهید د مقام سپکاوی کیږي."
عبدالله عبدالله د غونډې له برخوالو وغوښتل چې د حضرت صبغت الله مجددي خبرو ته دې غوږ ونیسي.
خو د عبدالله عبدلله له دغې غوښتنې سره سره بیا هم حضرت صبغت الله مجددي خبرې لنډې کړې.
ښاغلي مجددي وویل "وروڼو زه پوه نه شوم چې تاسې ولې داسې عکس العمل وښود، کله چې خدای په مونږ جهاد فرض کړ ما د جهاد اعلان وکړ، تر نننه ما ستاسې ټولو وروڼو نه بې له تبعیضه ملاتړ کړی دی، دې پنجشیر عزیز ته مې ویلي، چې پنجشیر مه وايئ، د زرګونو زمریانو نوم ورکړئ، ما چې د پنجشیر خلکو سره مرستې کړي دي، هیڅ چا ندي کړي، هیڅ رهبر دا کار ندی کړی."
خو د حضرت صبغت الله مجددي په خبرو کې مقاطعه وشوه او خبرې یې ودرولې او له همدې سره له غونډې دولتي چارواکي ووتل.
عبدرب الرسول سیاف
د حضرت صبغت الله مجددي له خبرو مخکې عبدرب الرسول سیاف چې له جهادي رهبرانو دی، وغږېد، سیاف د حدیثو په رڼا کې هغه خلک له دین بهر وګڼل چې له طالبانو او ځانمرګو سره مرسته کوي.
سیاف د ملي اردو، پولیسو او امنیتي ځواکونو ستاینه وکړه او هغه خلک چې د ملي امنیتي ځواکونو په جنازه کې ونډه نه اخلي غلامان وګڼل.
عبدرب الرسول سیاف پدې غونډه کې د جاسوسۍ په ضد د مبارزې غوښتنه هم وکړه، ویناء یې دا وه چې یوه کړۍ فعالیتونه کوي، ترڅو له ځینو ملکونو پیسې راوړي او په ويناء یې په اجیرانو یې وویشي.
د سپټمبر له نهمې چې د شورای نظار د مخکښ قومندان احمدشاه مسعود د مړینې ورځ ده هر کال نمانځنه کیږي خو سږ کال دا مراسم د لويې جرګې په خیمه کې په لویه کچه وو.
دا مراسم په داسې حال کې نمانځلي کیږي. چې لا هم د ټاکنو لانجه پای ته نده رسېدلې.