اشرف غني احمدزی د افغانستان ولسمشر شو

<p>د ټاکنو د کمیسیون مشر احمد یوسف نورستاني نن یکشنبه ماذدیګر د ټاکنو په کمیسیون کې د نوي منتخب ولسمشر د اعلان په مهال و نه ویل چې ښاغلي اشرف غني احمدزی له خپل سیال عبدالله عبدالله څومره رايې مخکې دی.</p> <p>ښاغلي نورستاني وویل "د ټاکنو خپلواک کمیسیون ښاغلی ډاکټر محمد اشرف غني احمدزی د افغانستان د اسلامي جمهوريت د جمهور رئيس په توګه اعلانوي، پدې ترتیب د ټاکنو بهیر پای ته رسوي."</p> <p>ښاغلي نورستاني وویل، چې د ټاکنو وروستۍ پایلې له دواړو ټاکنیزو ټیمونو سره شریکې کړي دي او دا کمیسیون به یې په نورو وروستیو مرحلو کې هم پایلې اعلان کړي.</p> <p>که څه هم د ټاکنو د کمیسیون مشر د خبریالانو پوښتنو ته ځواب و نه ویل خو د دواړو کاندیدانو ترمنځ د شوي سیاسي جوړ جاړي او هوکړه لیک د لاسلیک په تړاوو یې کاندیدانو ته مبارکي ورکړه.</p> <p>د ټاکنو د کمیسیون مشر وویل چې د سل په سلو کې د رایو له تفتیش وروسته ۱۲۶۰ د محلونو رايې باطلې شوي دي.</p> <p>ښاغلي نورستاني وویل چې ان د تفتیش په دوره کې هم دوی ندي توانېدلي چې د دواړو ټاکنیزو ټیمونو د غوښتنې په اساس د درغلیو دقیقه پلټنه وکړي.</p> <p>د ټاکنو د کمیسیون مشر وویل د الیکټرونیکي تذکرو نه شتون، او د بې امنۍ له امله د پوره شفافه ټاکنو کېدل هم ناشوني دي.</p> <p>هغه وویل د رایو د ورکوونکو شمېر ندی معلوم او د رایو ورکوونکو د لست نه موجودیت هم له خړو پړو ټاکنو سره مرسته کوي.</p> <p>د ټاکنو د کمیسیون تر اعلان مخکې نن غرمه د ارګ په ماڼۍ کې د ولسمشرۍ دواړو کاندیدانو د خپلو توافقاتو هوکړه لیک لاسلیک کړ.</p> <p>د ملي یووالي د حکومت د جوړولو دغه هوکړه لیک څو میاشتې وخت واخېست، سیاسي مذاکرات کله په ټپه او کله به له متضادو دریځونو سره مخامخ کېدل.</p> <p> د ارګ په ماڼۍ کې د ولسمشرۍ دواړو کاندیدانو دا هوکړه لیک په داسې یوې غونډې کې لاسلیک کړ، چې ولسمشر حامد کرزي د دولت لوړپوړو چارواکو او د ټاکنیزو ټیمونو غړو برخه درلوده.</p> <p>ددې هوکړه لیک په سر توافقات د تېرې شپې تر ناوخته لا روان ول، که څه هم دواړو کاندیدانو ویناووې و نه کړې او د هوکړه لیک په تړاوو یې معلومات ورنه کړل، خو ولسمشر حامد کرزي د دواړو کاندیدانو ترمنځ لاسلیک شوی هوکړه لیک یو افغاني تفاهم وګاڼه او وېل چې د هوکړه لیک محتوا د کاندیدانو خپل کار دی.</p> <p><strong>نوي ولسمشر ته د کرزي مبارکي</strong></p> <p>د افغانستان ولسمشر حامد کرزي محمد اشرف غني احمدزي ته د نوي منتخب ولسمشر په توګه مبارکي ورکړې ده.<br /> <br /> له ارګه نه په خپرې شوې خبرپاڼه کې راغلي چې تلوونکي ولسمشر حامد کرزي منتخب ولسمشر محمد اشرف غني احمدزي او اجرائیه رئيس عبدالله عبدالله ته د نن ورځې د شویو توافقاتو مبارکي هم ورکړې ده.<br /> <br /> ولسمشر کرزي د ټاکنو د پروسې د پای ته رسېدو هم هرکلی کړی دی.<br /> <br /> <strong>د لوړې مراسم</strong><br /> <br /> که څه هم د نوي منتخب ولسمشر لپاره د لوړې د مراسمو نېټه نده معلومه شوې، خو د عبدالله عبدالله د ټاکنیز ټیم ویاند سید اقا فاضل سانچارکي نن وویل ښايي د راتلوونکي اونۍ د دوشنبې په ورځ به د نوي ولسمشر د لوړې مراسم ترسره شي.<br /> <br /> ښاغلي سانچارکي وویل چې د نوي ولسمشر لوړه به په شاندارو مراسمو ترسره شي.<br /> <br /> دا ډول نن ماذدیګر د لوړې د مراسمو لپاره د تیاري کمیسیون هم غونډه کړې ده، دغه تیاري کمیسیون په تیاریو خبرې کړي خو نېټه یې نده مشخصه کړې.<br />  </p>