چارواکي وايي چې د کندهار ولایت په عینو مینې سیمه کې د پولیسو پر یولسمې حوزې د موټربم برید شوی دی.
برید نن د چهارشنبې په ورځ نومبر ۲۵ (لیندۍ پنځمه) سهار شاوخوا ۱۰:۳۰ بجې شوی دی.
د کندهار د یولسمې حوزې مرستیال موسی کلیم امریکا غږ ته وویل چې په دغه برید کې ۲۳ تنه ټپیان شوي دي.
د هغه په وینا ۱۷ پولیس او شپږ ملکي وګړي په ټپیانو کې شامل دي.
د کندهار د میرویس حوزوي روغتون ډاکټران وايي چې د پېښې له ځای څخه ۲۳ ټپيان دغه روغتون ته وروړل شوي چې اکثره یې برسیرن ټپيان وو او له درملنې وروسته رخصت شوي دي.
د دوی په وینا پنځه ټپیان لا هم په روغتون کې تر درملنې لاندې دي.
د کندهار د پولیسو ویاند جمال بارکزی پېښه تائیدوي خو وايي چې د تلفاتو او د چاودنې څرنګوالي په اړه به وروسته معلومات ورکړي.
بلخوا د دغه ولایت یو امنیتي چارواکی د نوم نه ښودلو په شرط وویل چې په برید کې ۱۴ پولیس او څلور ولسي وګړي ټپیان شوي دي.
د سرچینې په وینا په ټپیانو کې د حوزې امر سمونوال فضلي احمد هم شامل دی.
د پېښې عیني شاهدان وايي چې چاودنه ډېره زوروره وه او د سیمې اوسېدونکو ته یې مالي تاوانونه اړولي دي.
امنیتي ځواکونو د پېښې سیمه کلابند کړې ده.
د برید مسولیت تراوسه چا نه دی منلی.
