د افغانستان د بهرنیو چارو وزارت وايي لا هم له روسيې چارواکو سره د افغانستان د سولې د غونډې په اړه په خبرو بوخت دی.
ځینو پاکستاني رسنیو خبر ورکړی دی چې روسيې پاکستان ته بلنه ورکړې چې د نومبر په لومړۍ نیټه په مسکو کې د افغانستان د سولې په اړه غونډې ته خپل استازي ورولیږي. روسي چارواکو تر دې دمه د دغې غونډې د نیټې په هکله څه ندي ویلي.
دا هماغه غونډه ده چې څو میاشتې وړاندې، مسکو د افغان چارواکو په غوښتنه وځنډوله. ټاکل شوې وه چې پدې غونډه کې د طالبانو د استازو په ګډون د پاکستان، ایران، روسیې او افغانستان چارواکي ګډون وکړي.
روسيي چارواکو ویلي و چې امریکا ته یې هم پدغې غونډې کې د ګډون بلنه ورکړې وه، خو هغوی رد کړې ده.
اوس د افغانستان د باندنیو چارو د وزارت ویاند صبغت الله احمدي امریکا غږ وویل چې افغان حکومت لا هم د مسکو د غونډې پر څرنګوالي، نیټې او نورو جزئیاتو له روسیي چارواکو سره کومې موافقې ته نه دی رسېدلی.
ښاغلي احمدي وویل "لا هم دا د بحث وړ موضوع ده. موږ کوم مشخص تاریخ نه دی ورکړی. مسئله دا ده چې لا د جزیاتو په اړه او د زمان په اړه مو توافق نه دی کړی، موږ اول باید په دغو مسایلو توافق وکړو او بیا به په نورو مسایلو بحث وشي."
ښاغلي احمدي وویل چې د مسکو په غونډه کې د افغان حکومت د ګډون او نه ګډون مسئله د امریکایي چارواکو د نه ګډون پورې اړه نلري. هغه وویل چي افغانستان خپلې پرېکړې په خپله کوي.
خو، د بهرنیو چارو وزارت دا ټېنګار وکړ چې د نړۍ په هره برخه کې چې د افغان حکومت له مشرۍ او ګډون پرته پر افغانستان غونډې کیږي، نتیجه نه ورکوي.
