د افغانستان کرکټ بورډ په پاکستان باندې د دریو پرلپسې لوبو له بایللو وروسته نن یکشنبه اګست ۲۷ (وږي پنځمه)د اسیا کپ سیالیو ته د حشمت شهیدي په مشرۍ د ۱۷ لوبغاړو نومونه اعلان کړل.
په دغه لست کې نجیب ځدراڼ، شرف الدین اشرف او کریم جنت هم شامل دي. دوی د پاکستان خلاف لوبو کې نه وو.
وفادار مومند، فرید ملک او شاهد کمال، چې د پاکستان په خلاف لوبو کې وو، په دې لست کې نشته. له دې وراخوا نور ټول هماغه لوبغاړيدي چې د پاکستان خلاف لوبو کې وو.
د افغانستان کرکټ بورډ هیله ښودلې چې دا لوبډله به په اسیا کپ کې ښه ځلېږي.
د اسیا کپ سیالۍ د پاکستان او سري لانکا په کوربتوب د اګست میاشتې په ۳۰ نېټه د پاکستان په ملتان کې پیلېږي او د پایلوبې په ګډون یې ځینې لوبې په سري لانکا کې کېږي.
په دغو سیالیو کې شپږ لوبډلې پاکستان، افغانستان، هند، بنګله دېش، سريلانکا او نیپال لوبېږي. نیپال په لومړي ځل د اسیا کرکټ کپ سیالیو ته لار موندلې ده.
د اسیا کپ لومړۍ لوبه د چهارشنبې په ورځ د پاکستان او نیپال ترمنځ ده. د افغانستان لومړۍ لوبه د را روانې یکشنبې په ورځ له بنګله دېش او دویمه لوبه یې د بلې سه شنبې په ورځ له سري لانکا سره ده.
د دغو شپږو لوبډلو څلور یې بل پړاو ته لار کوي. پایلوبه یې د سپتمبر په ۱۷ نېټه ده.
فورم \ دبحث خونه