د ویسټ انډیز د کرکټ په تجارتي سیالیو "کرابین پریمیر لیګ" کې به دا وارې بیخي یو نوی افغان لوبغاړی لوبیږي.
د افغانستان د ۱۹کلنو لوبډلې ورو توپ اچونکی قیس احمد د کرابین پریمیر لیګ سیالیو ته واخیستل شو. دی به د سنټ لوشیا سټارز په لوبډلې کې لوبیږي. دا به لومړی ځل وي چې قیس احمد په نړیوالو تجارتي سیالیو کې برخه اخلي. دی په ۷۵۰۰ ډالرو وپېرودل شو.
قیس احمد د ۱۹ کلنو په نړیوال جام کې ښه وځلېده او د غوره توپ اچوونکو په لست کې راغلی و. دی په ښي لاس ورو توپ اچوي چې د کرکټ په ژبه لیګ بریګر بلل کیږي. دی توپ ډېر تاوولی شي او همدغه کار منډه جوړونکو ته سرخوږی جوړوي.
د سنټ لوشیا لوبډلې په خپل رسمي ټویټر کې قیس احمد ته ښه راغلاست ویلی دی.
ده په نړیوال جام کې په سختو او له فشار ډکو حالاتو کې د مخالفو لوبډلو لوبغاړي وسوځول او د نړیوال جام په کوارټر فاینل کې د نیوزلنډ څلور لوبغاړي وسوځول او د افغانستان په بري کې یې مهم رول ولوبوه.
د کرابین لیګ بولۍ ته د ویسټ انډیز او نړۍ شاوخوا ۲۵۰ لوبغاړي پېژندل شوي وو. تېرکال د کرابین په پریمیر لیګ کې محمد نبي او راشد خان هم لوبېدلي وو، خو سږکال هغوی بوخت دي.
د ویسټ انډیز تجارتي سیالۍ د اګست په اتمه پیلیږي او سپتمبر ۱۶ ختمیږي. ټاکل شوې چې د افغانستان د کرکټ ملي لوبډله په اګسټ کې ایرللنډ ته د سیالیو لپاره ولاړه شي.
