د افغانستان د ټاکنیزو شکایتونو کمېسیون د ثبت شوو استینافي او استثنايي اعتراضونو په اړه خپله پرېکړه اعلان کړه چې د ثبت شویو اعتراضونو پر اساس یو شمیر رای بیا شمېرل او څېړل کیږي.
د دغه کمېسیون مشرې زهره بیان شینواري د چهارشنبې په ورځ فبروري پنځمه (سلواغې۱۶) خبریالانو ته وویل، ۱۳۷۶۳۰مشکوکې رای چې په اړه یې اعتراضونه وجود لري، ۱۰ سلنه یې او له وخت مخکي د ۱۰۲۰۰۰ ثبت شوو رایو له ډلې ۱۵ سلنه به یې بیا تفتیش او وشمارل شي.
د اغلې شینوارې په خبره که چیري له تفتیش او بیا شمېرلو مخکې په نظر کې نیول شوي ۶۵سلنه نمونې او معیارونه تکمل شي، ټولې رای معتبرې ګڼل کیږي، خو که چیري دغه معیارونه تکمل نه وي دغه ټولې رای بیا شمېرل او تفتیش کیږي.
په دغه څېړنه کې په نظر کې نیول شوي معیارونه، د ژورنال یو شان والی د پایلو پاڼه او بایومیټریکي معلومات شامل دي.
د ټاکنیزو شکایتونو کمېسیون کمېشنر او ویاند محمد قاسم الیاسي د پایلو په پاڼه کې د رایو د تفاوت او بایومیرتیکي معلوماتو په اړه ثبت شوو اعتراضونو ته په کتو وویل، که چیري دغه تفاوت له شپږو رایو څخه پورته وي هغه محلونه به بیا تفتیش شي.
د شکایتونو کمېسیون په خبره ۲۹۸ محلونه چې د رایو د بایومیتریک د څرنګوالي په اړه یې اعتراضونه شته بیا شمېرنې ته وړاندي کیږي.
ښاغلي الیاسي تمه وښودله چې د ټاکنو کمېسیون وتوانیږي تر یوې اونۍ وروسته د ټاکنو پایلې اعلان کړي.
تر دا مهاله د افغانستان د ټاکنو خپلواک کمېسیون او ټاکنیزو ټکټونو د شکایتونو کمېسیون د ننني کنفرانس په اړه تبصره نه ده کړې.
د افغانستان د ټاکنو کمېسیون د مرغومې میاشتې پر لومړۍ نېټه د یادو ټاکنو لومړنۍ پایلې اعلان کړې چې له ولسمشر محمد اشرف غني پرته نورو ټولو کاندیدانو ورسره مخالفت وکړ.
د افغانستان ولسمشریزې ټاکنې چې د میزان میاشتې پر شپږمه تر سره شوي تر دا مهاله یې وروستۍ پایلې نه دي اعلان شوي.
