د کرکټ په چمپینز ټرافي کې د افغانستان او انګلنډ د لوبې وروسته ځینو بریتانوي رسنیو لیکلي چې د افغانستان د کرکټ ملي لوبډله ستره حوصله لري.
کله کله د کرکټ یا هم د نورو لوبو په نړیوالو سیالیو کې ځینې داسې لوبې وشي چې تر پایلوبې زیاته زړه راکښونکې وي، او هره شېبه یې هېښوونکې وي، همداسې یوه لوبه د فبرورۍ پر ۲۶مه د پاکستان په لاهور کې د کرکټ د لوبې بنسټ ایښودونکي هېواد انګلستان او په دې لوبو کې وروسته شامل شوي هېواد افغانستان ترمینځ وه.
د افغانستان او انګلنډ ترمنځ په لوبه د بریتانیا ځینو ورځپاڼو شننې هم کړې. ګارډین ورځپاڼه لیکي چې دا یوه ناڅاپي پایله نه وه، بلکې د قوي اعصابو لوبه وه چې د افغانستان لوبډلې په پوره ولولې او مهارت سره په بري سره پای ته ورسوله او افغانستان یو مستحق ګټونکی وو.
د ورځپاڼې په لیکنه د ابراهیم ځدراڼ بې سارې کارکردګي د هېرولو نه ده، چې په لوړ هنر او کمال یې خپله شپږمه یوه ورځنۍ سلیزه جوړه کړه.
ګارډین لیکي د افغانستان دوه آلراونډرانو، عظمتالله او نبي، نه یوازې دا چې د افغانستان لپاره د بریا مرکزي سټې وې، بلکې نیمه پایلوبې ته د رسېدو هیلې یې هم ژوندۍ وساتلې.
د ګارډین ورځپاڼې غوندې کټ مټ بي بي سي هم دغه ټکي کارولي او په لاهور کې د افغانستان له لاسه د انګلستان ماتې یې رواني فشار بللی.
انګلستان یو وخت د سپین توپ کرکټ معیاري لوبډله وه، او په نږدې وختونو کې یې هم داسې لوبې ګټلې، خو هغه ویاړ چې د ایون مورګن تر مشري لاندې جوړ شوی و، د ۱۸ میاشتو په موده کې بایلل شوی دی.
انډیا ټوډې لیکي چې د افغان لوبډلې بریا د حیرانتیا وړ ځکه نه ده چې دا لوبډله اوس د سر سر په سیالانو کې خپل ځای جوړوي.
کله چې د انګلستان وروستۍ ویکټ وسوځېده، د لاهور په لوبغالي کې زرګونه افغان مینوال له خوښۍ په اتڼونو شول.
د فبرورۍ پر ۲۶ د لاهور په قذافې لوبغالي کې د افغانستان کرکټ ملي لوبډلې د انګلستان لوبډله په اتو منډو ماته کړه او لوبه يې وګټله.
د ابراهیم ځدراڼ د ۱۷۷ منډو په مټ، افغانستان د اووه وېکټو په سوځېدو سره ۳۲۵ منډې وکړې او په ځواب کې يې د انګلستان ټوله لوبډله په ۳۱۷ منډو وسوځېده او افغانستان دا سیالي په خپل نوم کړه.
د دې لوبې په ګټلو د افغانستان د کرکټ مینه وال زښت خوشاله دي.
له انګلنډ څخه د لوبې ګټلو ته د افغانانو غبرګونونه
په پېښور کې د ننګرهار یو ځوان عبدالباسط وايي، د کرکټ اتلانو یې د هېواد نوم په نړۍ کې روښانه کړي
له امریکا غږ سره په خبرو کې هغه وویل، له انګلستانه لوبه ګټل د افغانستان لپاره ډېر د خوښۍ زېری دی. "موږ ټوله ورځ ټي وي ته ناست وو. دا خوشالي په الفاظو کې نه شو بیانولی، موږ په خپلو اتلانو ویاړو چې هر وخت يې ښه لوبه کړې ده. "
د کابل ستانکزی بهیر چې د پښتونخوا د هري پور د کډوالو پنډغالي کې میشت دی، وايي، په افغانستان کې د کرکټ لوبو لپاره هغسې اسانتیاوې نشته لکه نور نړۍ چې یې لري خو افغان لوبډلې د انګلستان پروړاندې لوبې سره نړۍ حیرانه کړه.
له امریکا غږ سره په خبرو کې هغه وویل، "موږ ټول ملګري ورته ناست وو ډېره خوندوره لوبه وه او موږ خپله خوشالي نه شو بیانولی او نه خپل احساسات په ټکیو کې بیانولی شو. "
په کوټه کې د افغان کرکټ ملي لوبډلې مېنوال همایون خان کاسی وايي، په دا وروستیو کې له هره پلوه ملي لوبډله ډېره تکړه شوې ده. خو د دې تکړه والي او ولولې ترشا لوی سرخېل راشد خان دی.
له امریکا غږ سره په خبرو کې کاسي زیاته کړه، "راشد خان لوبډلې ته دا فکر راوړی دی، چې موږ تر هېچا هم په لوبه او هنر کې کم نه یو. "
همایو خان کاسی وايي، په افغان ملي لوبډله کې یوه ځانګړنه دا ده چې ځینو لوبغاړي لکه راشد خان، ګربز، ابراهیم ځدراڼ، محمد نبي، عظمت عمرزی او ګلبدین په یوازې سر خپل ټیم ته بری راوړلی شي.
کاسی زیاتوي، په یوه لوبډله کې چې انفرادي لوب ګټونکي زیات وي، نو د هغې ګټه دا وي که یو لوبغاړی و نه چلېږي نو بل راوړاندي شي. نو لکه د لاهور په لوبه کې ګربز و نه ځلېد خو ځدراڼ میدان یووړ.
د نوموړي په وینا د کرکټ لوبې شنونکي وايي، د نړۍ په شپږو سترو لوبډلو کې افغان لوبډله راځي او په اسیايي لوبډلو کې تر هند وروسته "زموږ ملي لوبډله ده. سري لنکا، بنګله دېش او پاکستان خو یې اوس ګرسره په سیالۍ کې نه راځي. "
همایون کاسی زیاتوي دا مهال یوازې هند، استرالیا او جنوي افریقا د افغانستان د ټکر لوبډلې دي، نورې نشته.
خو نوموړی وايي، پکار ده چې افغان لوبډله خپل فیلډینګ پیاوړی کړي او ځینې تېز توپ اچونکي راپیدا کړي. او راشد خان د ټیم کپتان کړي.
په اسلام اباد کې د کرکټ لوبو شنونکی عبدالغفار خان وايي دا لومړی ځل دی چې د افغانستان کرکټ لوبډله په چمپینز ټرافۍ کې لوبېږي او ډېره ښه لوبه يې وکړه او له استرالیا سره به هم ښه لوبه وکړي.
"زما په اند د افغانستان لوبډلې ته پرمخ تلل اسانه دي ځکه چې هغوی په فشار کې هم لوبه کولی شي. "
تر دا مهاله اسټرالیا په چمپینز ټرافي کې دوې لوبې کړي دي چې په هغه کې یوه له انګلستانه ګټلې ده خو له جنوبي افریقا سره يې لوبه د باران له امله ونه شوه.
فورم \ دبحث خونه