چمپینز ټرافي؛ د پاکستان او بنګله دېش لوبه د باران له کبله لغوه شوه

د کرکټ چمپینز ټرافي سیالیو په لړ کې د پنجشنبې په ورځ، فبروري ۲۷ (کب نهمه) د کوربه پاکستان او بنګله دېش لوبه په راولپنډۍ کې د باران له کبله لغوه شوه او په دغه ټورنمنټ کې د پاکستان سفر پای ته ورسېد.

پاکستان په ۲۰۱۷ کې دغه ۵۰ اوریز جام ګټلی و خو په په روانو سیالیو کې په اې ګروپ کې نیوزیلنډ او هند ته خپلې لوبې وبایللې. بنګله دیش هم له وړاندې تګ څخه پاتې شوی دی.

پاکستان د منډو د اوسط له مخې له بنګله دېش څخه وروسته دی او په خپل ګروپ کې یې څلورم او وروستی مقام ګټلی دی.

د پاکستان او بنګله دېش ترمنځ لوبه په راولپنډۍ کې کېده چېرې چې د تیرې شپې راهیسې وقفوي باران دوام درلود. له همدې کبله لوبه پیل نه شوه او د لوبې د څارونکو لخوا د څو معاینو د کېدو وروسته ددې لوبې د لغوه کېدو پرېکړه وشوه.

له اې ګروپ څخه نیوزیلنډ او هند نیمه پایلوبو ته وتلي دي.

په بي ګروپ کې افغانستان، جنوبي افریقا او استرالیا نیمه پایلوبو ته د تللو لپاره سیالي کوي او انګلنډ له وړاندې تګ څخه پاتې شوی دی.

^{ددې راپور معلومات له فرانس پرس اژانس څخه اخیستل شوي.}