طالبان چې تر خپل واک لاندې سیمو کې له خلکو نه مالیه، عشر او زکات ټولوي اوس یو بل گام هم مخکې تللي او د ماین پاکۍ د موسسې په څیر د نړیوالې مرستندویه ټولنو په گډون د غیر دولتي موسسو نه هم مالیه غواړي.
خبریاله ژنیفر گلاس، چې له کابل نه څو بهرنیو رسنیو ته کار کوي د کاناډا د سي بي سي خبري شبکې ته په رپوټ کې ویلي طالبانو تر خپلې ولکې لاندې سیمو د میشتو غیر دولتي سازمانونو نه غوښتي چې ځانونه د طالبانو سره ثبت کړي او د خپلو پروژو د تمویل په اړه معلومات ورکړي.
په جولای میاشت کې د باندنۍ پرمختیا انستیتوت هم په یوه راپور کې وویل چې طالبانو د یوې ترهگرۍ او بریدگرۍ ډلې پرځای د یو "منتظر حکومت" بڼه غوره کړې ده.
رپوټ وایي طالبان لږ تر لږه په اوه ولایتونو کې د بریښنا د لگښت پیسې ټولوي او تر خپلې ولکې لاندې سیمو کې په روغتیایي، زده کړو او عدلي چارو نفوذ لري او خلکو ته ځان د یو "حکومت په توگه ورپیژني.
"د دولت په توگه"
د راپور په حواله طالبان خپل مالیه ټولونکي لري له کروندگرو او سوداگرو نه عشر هم اخلي.
په افغانستان کې د ملگرو ملتونو د ماین پاکۍ د پروگرام مسؤل پتریک فروچت د کاناډا سي بي اس نشراتي شبکې ته ویلي چې د طالبانو غوښتنې ته غاړه نه ایښول غیر دولتي موسسو ته جدي ګواښ ګنل کیږي.
ښاغلي فروچت ویلي چې اوس د افغانستان په لویدیځو، ختیځو او جنوبي سیمو کې د ملگرو ملتونو د ماین پاکۍ د ډلو فعالیت چې د طالبانو د ولکې لاندې دي دریدلی دی.
د سي بي سي خبري شبکې په رپوټ کې راغلي چې همدا اوس د کندهار په ژیړۍ ولسواکۍ کې ٢٠٠ کیلومتر مربع سیمه په مایونونو ډکه ده، خو د طالبانو نه د ډار او گواښ په وجه د ماین پاکۍ ډلې دغې ولسوالۍ ته له تللو ډډه کوي.
یو شمیر موسسو چې د طالبانو د ولکې لاندې سیمو کې کار کوي ادعا کړې چې د طالبانو یو شمیر کلینیکونو ته یې وسایل او تجهیزات اخیستي او یا یې خپل کارکوونکي د طالبانو په غوښتنه گمارلي دي.
ددغې خبري شبکې د رپوټ په بنسټ پر غیر دولتي موسسو باندې د طالبانو د مقرراتو رسمي کیدل ددغو سازمانو فعالیت ته زمینه تنگه کړې او یو شمیر موسسو د طالبانو تر کنترول لاندې ساحو کې خپل کار او فعالیت محدود کړی دی.
