د افغانستان دفاع وزارت وايي، د بادغیس ولایت په جوند ولسوالۍ کې د ځانګړي عملیاتو پرمهال ۱۰ داعش وسله وال وژلي دي.
دفاع وزارت ویلي دغه داعش وسله وال تېره شپه د جوند ولسوالۍ په چشمه شرین سیمه کې د افغان ځواکونو په عملیاتو کې وژل شوي دي.
د فاع وزارت د یکشنبې په ورځ د «مرغومې پر ۲۳مه» په یوې اعلامیې کې ویلي چې د یادو عملیاتو پر مهال ۱۶ نور داعش وسله وال چې بهرنیان و له خپلو کورنیو سره چې ښځې او ماشومان هم پکې شامل دي نیول شوي دي.
پر همدې مهال د بادغیس سیمه ییزو چارواکو هم ویلي چې په افغانستان کې د قاطع ملاتړ ماموریت تېره شپه په جوند ولسوالۍ کې د طالبانو او داعش پر مرکزونو باندې هوايي بریدونه کړي دي.
د بادغیس د والي ویاند جمشید شهابي امریکا غږ ته وویل چې په دغو بریدونو کې ۱۸ وسله وال طالبان او ۱۰ داعش وسله وال وژل شوي دي.
نوموړي زیاته کړه چې د قاطع ملاتړ ماموریت په سیمه کې د وسله والو طالبانو پر یوه لوی زندان برید کړی چې د داعش ډلې شااوخوا څلوېښت زنداني غړي له ځان سره وړي دي.
دا په داسې حال کې ده چې تېره ورځ امریکايي ځواکونو هم د افغانستان په ختیځ کې د داعش ډلې د یوه جګپوړي قوماندان د وژل کېدو خبر ورکړی و.
وسله والو طالبانو تر دامهاله په دې اړه څه نه دي ویلي.
